TV პირველის ოპერატორის, ლექსო ლაშქარავას სახელობის პრემიის გამარჯვებულები რადიო თავისუფლებისა და ტელეკომპანია ბორჯომის ჟურნალისტები გახდნენ. საუკეთესო უფლებადაცვითი ვიდეო-რეპორტაჟის კატეგორიაში რადიო თავისუფლების ჟურნალისტებმა, თორნიკე მანდარიამ და დათო ქორიძემ გაიმარჯვეს მასალით — ცრურწმენა და სიამაყე. საუკეთესო უფლებადაცვითი სტატიის კატეგორიაში კი პრიზი ტელეკომპანია ბორჯომის ჟურნალისტმა, ნინო ვართაპეტიანმა აიღო, სტატიისთვის — დეპრესია და შფოთვითი აშლილობა — პანდემიის გავლენა ბავშვების ფსიქიკურ ჯანმრთელობაზე.

დაჯილდოების ცერემონია დღეს, 9 დეკემბერს გაიმართა. მედიის წარმომადგენლებისთვის პრემია ადამიანების უფლებათა სახლმა დააწესა. ორგანიზაციის განცხადებით, ამით სურდათ 5 ივლისის მოვლენებს გამოხმაურებოდნენ. განმარტავდნენ, რომ ხშირად ჟურნალისტები უფლებადამცველები ხდებიან, როდესაც უფლებადარღვევებს აშუქებენ, ზრდიან საზოგადოების ცნობიერებას ადამიანის ძირითადი უფლებებისა და თავისუფლებების შესახებ, რის გამოც ხშირად ძალადობის, შევიწროებისა და მუქარის მსხვერპლი ხდებიან.

საპატრიარქოს დაორგანიზებულ ჰომოფობიური და ძალადობრივი ჯგუფების კონტრაქციაზე მედიის 50-ზე მეტი წარმომადგენელი დაშავდა. მათ შორის იყვნენ რადიო თავისუფლების ჟურნალისტები თორნიკე მანდარია და დათო ქორიძე.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურნალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლისს გარდაიცვალა. ამის გამო, მედიამ იმ დღესვე საპროტესტო აქცია გამართა, რადგან სახელმწიფომ მედიის და გამოხატვის უფლების დაცვა ვერ/არ უზრუნველყო და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა. აღსანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.