ქართული ოცნების თავმჯდომარის, ირაკლი კობახიძის განცხადებით, შეაგროვებენ "დეპუტატების ნიჭიერი ბავშვების სიას" და მათ სწავლას დააფინანსებენ. ეს კომენტარი კობახიძემ მას შემდეგ გააკეთა, რაც ყოფილმა პრეზიდენტმა, მიხეილ სააკაშვილმა სასამართლოზე თქვა, რომ მისი შვილი გინესის რეკორდების წიგნში შევიდა და მხოლოდ ამის გამოც კი ეკუთვნოდა სწავლის დაფინანსება.

"ე.წ. პიჯაკების საქმეში არის უმძიმესი კორუფციული დანაშაულები. მათ შორის, დღეს საუბრობდა ის, რაც წავიკითხე, შვილთან დაკავშირებით და იმით დაასაბუთა კორუფციული სკანდალი შვილთან დაკავშირებით, რომ მისი შვილი არის ნიჭიერი. ჩვენ ახლა შევაგროვებთ დეპუტატების ნიჭიერი ბავშვების სიას და დავაფინანსებთ თითოეულის სკოლის გადასახადს. ნუ, სამარცხვინოა ეს ყველაფერი", — ამბობს კობახიძე.

მიხეილ სააკაშვილმა სასამართლო პროცესზე, ე.წ. პიჯაკების საქმის განხილვისას შვილზე, ედუარდ სააკაშვილზე ისაუბრა. ის შეეხო ბრალდების იმ ნაწილს, რომლის მიხედვითაც სახელმწიფო ბიუჯეტიდან საკუთარი შვილის განათლების მიღება დააფინანსა. სააკაშვილი ამბობს, რომ ამას კანონი არ კრძალავს.