ალერგოლოგ-იმუნოლოგი ბიძინა კულუმბეგოვი აცხადებს, რომ კორონავირუსის ახალ შტამზე, ომიკრონზე არსებული ინფორმაცია იძლევა იმის დაშვების საფუძველს, რომ შესაძლოა მასზე ნაკლებად იმოქმედოს არსებულმა ვაქცინებმა, ასევე, უკვე გადატანილი შტამების შედეგად შეძენილმა იმუნიტეტმა. ის ვარაუდობს, რომ ასეთ შემთხვევაში გაიზრდება რეინფიცირების რისკები.

"თეორიული დაშვება, მასში თავმოყრილი მუტაციები უკვე იძლევა იმის შეფასების საშუალებას, რომ ის არის იმდენად სახეცვლილი, რომ გარკვეულწილად, პრობლემები იქმნება არსებულ იმუნიტეტთან — ეს იქნება ხელოვნური თუ შეძენილი [...] ეს სამწუხაროდ, რასაკვირველია, ახალი ტალღების და ინფექციის ახალი ძალით შემობრუნებას ნიშნავს, რაც ძალიან სამწუხარო და რთული სცენარია", — განაცხადა კულუმბეგოვმა.

იმუნოლოგი აცხადებს, რომ პერსონალური დაცვის საშუალებები, მაგალითად, პირბადის ტარება, ხშირი დეზინფექცია და დისტანციის დაცვა გვიცავს ყველა ტიპის შტამისგან.

კოლეგის მსგავსად, ინფექციური საავადმყოფოს დირექტორი, თენგიზ ცერცვაძეც აცხადებს, რომ ჯერჯერობით უცნობია, იმოქმედებს თუ არა ომიკრონზე დღეს არსებული ვაქცინები. ასევე, უცნობია მისი თვისებები. მაგალითად, უფრო უფრო სწრაფი და სახიფათოა თუ არა ვიდრე დელტა შტამი.

25 ნოემბერს სამხრეთაფრიკელმა მეცნიერებმა კორონავირუსის ახალი შტამის დაფიქსირების შესახებ განაცხადეს. B.1.1.529-ად წოდებულ ახალ შტამს ჯანდაცვის მსოფლიო ორგანიზაციამ ომიკრონი შეარქვა.

გაიგე მეტი: