უზენაესი სასამართლოს მოსამართლეობის კანდიდატმა, ნინო სანდოძემ საპარლამენტო მოსმენისას ექსპრეზიდენტ მიხეილ სააკაშვილის სასამართლო სხდომაზე არმიყვანაზე ისაუბრა. მისი თქმით, ეს რომ ყოფილიყო პრეცედენტი სააკაშვილის საქმეზე, შესაძლოა კითხვები გაჩენილიყო, თუმცა აცხადებს, რომ მსგავსი არაერთი შემთხვევა ახსოვს.

"არაერთ საქმეზე ხდება, როდესაც სასამართლო იწვევს პატიმარს და სასჯელაღსრულების დაწესებულება ამ პატიმრის ბადრაგირებას სასამართლოში არ ახორციელებს. ეს რომ ყოფილიყო ერთ კონკრეტულ საქმესთან დაკავშირებით, შესაძლებელია რაღაც კითხვის ნიშნები გაჩენილიყო, თუმცა ჩემ წარმოებაში არსებულ საქმეებზე — ახლა, გარკვეულწილად, ელექტრონულმა ჩართვამ გვიშველა, თორემ სააპელაციო ინსტანციაში ეს იყო საქმეთა განხილვის გაჭიანურების 90% იმის მიზეზი, რომ სასჯელაღსრულების დაწესებულება სასამართლოს აცნობებს, რომ საკმარისი ადამიანური რესურსის და ტექნიკური პირობების არარსებობის გამო ვერ ახორციელებს პირი ბადრაგირებას", — განაცხადა სანდოძემ.

ორგანიზაცია უფლებები საქართველოს წარმომადგენელმა, კახა წიქარიშვილმა სანდოძეს სთოხოვა, კონკრეტული პასუხი გაეცა:

წიქარიშვილი: "კი ან არა რომ უპასუხოთ, არის თუ არა კანონდარღვევა, როცა მოსამართლის გამოძახების მიუხედავად სასჯელაღსრულებას არ მიჰყავს პატიმარი [სასამართლოში]?"

სანდოძე: "აქ უნდა გაირკვეს მიზეზი, თუ რატომ არ იქნა ბადრაგირება განხორციელებული. თუ შეეძლო და არ მიიყვანა, ეს სხვა საკითხია".

წიქარიშვილი: "ორი მიზეზი იქნა დასახელებული, ბრალდებულის ჯანმრთელობა და პატიმრის უსაფრთხოება. არის თუ არა საკმარისი მიზეზი და ეს შეესაბამება თუ არა კანონს".

სანდოძე: "ვფიქრობ, რომ საკმარისი მიზეზია, თუ ჩათვალა, რომ ვერ უზრუნველყოფდა უსაფრთხოებას. ამ საკითხებზე სწორედ რომ პენიტენციური დაწესებულებაა ვალდებული, რომ უზრუნველყოს იქ განთავსებულ პირთა უსაფრთხოება".

მეორე დღეა პარლამენტში უზენაესი სასამართლოს მოსამართლეობის კანდიდატებს უსმენენ. აღსანიშნავია, რომ შარლ მიშელის შეთანხმების ერთ-ერთი მთავარი პუნქტი სასამართლო რეფორმას ეხებოდა. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეეკავებინათ. ამის მიუხედავად, პარლამენტმა სასამართლოს მოსამართლეობის 6 კანდიდატი უვადოდ დაამტკიცა. პარალელურად კი, ქართული ოცნება აცხადებდა, რომ შარლ მიშელის დოკუმენტი მათი მხრიდან სრულდება. იმის საილუსტრაციოდ, რომ შეთანხმებაში ნამდვილად ეწერა უზენაესი სასამართლოს მოსამართლეების დანიშვნებისგან თავის შეკავების შესახებ, ამერიკის საელჩომ ტვიტერზე გამოაქვეყნა დოკუმენტის ფოტო, სადაც შეთანხმების ეს ნაწილი ყვითლად არის გახაზული.

ამის შემდეგ იყო ევროკავშირის წარმომადგენლის განცხადება იმის შესახებ, რომ საქართველომ მაკროფინანსური დახმარების მიღების პირობები ვერ შეასრულა. ჟულიენ კრამპის თქმით, ამ განცხადებამდე ქართული ოცნების ხელისუფლება აქტიურად საუბრობდა იმაზე, რომ ევროკავშირისგან მაკროფინანსური დახმარების მეორე ნაწილზე უარს ამბობენ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა აღარ არის.

ამასთანავე, ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მიერ გამოქვეყნებული ანგარიშის მიხედვით, საქართველოს უზენაესი სასამართლოს მოსამართლეობის კანდიდატების წარდგენის პროცესში გამოვლენილმა ხარვეზებმა ქვეყანაში სასამართლო სისტემის დამოუკიდებლობის საკითხი რისკის ქვეშ დააყენა.