მოძრაობა სირცხვილიას აქტივისტი, რომელიც სახელმწიფო უსაფრთხოების შენობასთან 13 ნოემბერს დააკავეს, ბათუმის საქალაქო სასამართლომ გაამართლა. ინფორმაცია ამის შესახებ On.ge-ს ბათუმის საქალაქო სასამართლოში დაუდასტურეს.

"მოსამართლე ირმა ტოგონიძემ თამარი გაამართლა, როგორც წვრილმანი ხულიგნობის, ასევე, პოლიციელების კანონიერი მოთხოვნის დაუმორჩილებლობის ნაწილში. მოსამართლემ ხაზი გაუსვა ვიდეომტკიცებულებას, სადაც ნათლად ჩანს, რომ თამარ კურატიშვილი გზის სავალი ნაწილიდან ტროტუარზე გადასვლისკენ მოუწოდებს სხვა აქტივისტებს და მიემართება კიდეც, თუმცა პოლიციელი მას ამის საშუალებას არ აძლევს, მოუწოდებს მას ვიდეოგადაღების შეწყვეტისკენ და აკავებს", — აცხადებს სირცხვილია.

მათივე თქმით, უკანონო დაკავების გამო თამარ კურატიშვილმა იზოლატორში 48 საათი გაატარა და ამ ნაწილში ის სამართლებრივ დავას განაგრძობს.

15 ნოემბერს სირცხვილიამ გამოაქვეყნა ვიდეო, სადაც მათი ბათუმის ოფისის ხელმძღვანელის, თამარ კურატიშვილის დაკავებაა ასახული. კადრებში ისმის პოლიციელის მოთხოვნა ვიდეოს გადაღების შეწყვეტასთან დაკავშირებით. სამართლადამცველი აქტივისტს, ასევე, ეუბნება, რომ აქციის გამართვისთვის მას ნებართვა სჭირდება.

"გამორთე, ჟურნალისტი ხომ არა ხარ? კაი, დააკავე", — ამბობს შსს-ს წარმომადგენელი და კურატიშვილს მანქანაში სვამს.