რეანიმატოლოგის თქმით, ექსპრეზიდენტი მიხეილ სააკაშვილი ახლა რეანიმაციაშია. ამასთან ის ამბობს, რომ პაციენტმა მცირე ხნით გონება დაკარგა. ასევე, ჰქონდა მაღალი წნევა. ექიმის თქმით, პაციენტი აბსოლუტურად სტაბილურ მდგომარეობაშია.

"ჰემოდინამიკა, ობსიგენაციის მაჩვენებლები, სუნთქვის პარამეტრები არის ნორმის ფარგლებში. იყო სინკოპეს ეპიზოდი. დღეს მოვედი იმიტომ, რომ მენახა პაციენტი, სანახავად მოვედი და ასეთი რამ მოხდა შემთხვევით, თუმცა ხანმოკლე, მცირე რეანიმაციული ღონისძიებების შედეგად მისი მდგომარეობა ახლა არის სტაბილური", — ამბობს ექიმი.

მისივე თქმით, ის მიხეილ სააკაშვილთან კონსულტაციისთვის იმყოფებოდა. რეანიმატოლოგმა, ასევე, აღნიშნა, რომ პაციენტი კონტაქტურია, პასუხობს ყველა კითხვაზე.

ექსპრეზიდენტ მიხეილ სააკაშვილის ადვოკატმა დაახლოებით ერთი საათის წინ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა".

ამის შემდეგ განცხადება სპეციალურმა პენიტენციურმა სამსახურმაც გაავრცელა, სადაც ამბობდნენ, რომ სააკაშვილის ჯანმრთელობის მდგომარეობა სტაბილურია.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

გაიგე მეტი: