სპეციალური პენიტენციური სამსახურის განცხადებით, ექსპრეზიდენტ მიხეილ სააკაშვილის ჯანმრთელობის მდგომარეობა სტაბილურია. ამასთან, აღნიშნავენ, რომ მიხეილ სააკაშვილთან ამ წუთებში მისი ადვოკატი ნიკა გვარამია იმყოფება.

"მიხეილ სააკაშვილის ჯანმრთელობის მდგომარეობა სტაბილურია. ცოტა ხანში ექიმი რეანიმატოლოგი გააკეთებს კომენტარს მედიისთვის", – ნათქვამია უწყების განცხადებაში.

მიხეილ სააკაშვილის ადვოკატის, ბექა ბასილაიას თქმით, პენიტენციური სამსახურისგან მიღებული ინფორმაციაზე დაყრდნობით, სახალხო დამცველის აპარატში მათ განუცხადეს, რომ ექსპრეზიდენტის ჯანმრთელობის მდგომარეობა დასტაბილურდა.

"სახალხო დამცველის აპარატთან გვაქვს კომუნიკაცია და გვითხრეს, რომ ამ წუთას პენიტენციურისგან მიღებული ინფორმაციაზე დაყრდნობით ამბობენ, რომ მდგომარეობა დასტაბილურდა. მეტი დეტალი არაფერი ვიცი", — განაცხადა ბასილაიამ.

მან დაახლოებით ნახევარი საათის წინ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა".

"ძალიან მძიმედ იყო მიშა, როცა ჩვნ გვხდებოდა და რომ გამოდიოდა მოსხლეტით წაიქცა და გადააწვინეს საწოლზე. 10 წუთია, რაც აიყვანეს, შეიძლება ცოტა მეტი, ცოტა ნაკლები. როდესაც წაიქცა, იქ წაქცეულზე ხელით გავუხსენით თვალები", — თქვა მან.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

გაიგე მეტი: