ადამიანის უფლებათა ევროპულმა სასამართლომ მოხის მეჩეთთან დაკავშირებულ საქმეზე რელიგიის საფუძველზე დისკრიმინაცია დაადგინა. სტრასბურგის სასამართლო, ასევე, ამბობს, რომ გამოძიება არაეფექტური იყო ოთხი განმცხადებლის საჩივრების მიმართ, რომლებიც მიეკუთვნებიან მუსულმანურ უმცირესობას. ამასთან, ევროპული სასამართლოს გადაწყვეტილებაში ვკითხულობთ, რომ ადგილი ჰქონდა პოლიციის მიერ ძალის გადამეტებასა და დისკრიმინაციული ენის გამოყენებას მათი დაკავების დროს. სასამართლოს გადაწყვეტილებით სახელმწიფომ ევროპული კონვენციის მე-3 და მე-14 მუხლები დაარღვია, რაც წამების, არაადამიანური და ღირსების შემლახავი მოპყრობის და დისკრიმინაციის აკრძალვას გულისხმობს.

განმცხადებლები საქართველოს მოქალაქეები იყვნენ, რომლებიც მუსულმანურ უმცირესობას მიეკუთვნებიან. დაზარალებულთა ინტერესებს სასამართლოში სოციალური სამართლიანობის ცენტრი წარმოადგენდა. სტრასბურგმა გადაწყვეტილება საქმეზე "მიქელაძე და სხვები საქართველოს წინააღმდეგ" 16 ნოემბერს გამოაცხადა.

სოფელი მოხე სამხრეთ საქართველოში, სამცხე-ჯავახეთის მხარეში, ადიგენის მუნიციპალიტეტში მდებარეობს.

1960-იან წლებში სოფელში დასახლდნენ ეკომიგრანტები მაღალმთიანი აჭარიდან. მოსახლეობის უმრავლესობა მუსლიმია. 2014 წლის აღწერის მონაცემებით სოფელში 254 ადამიანი ცხოვრობს.

მოხეს ცენტრში მდგარ შენობაზე დავა 2014 წლის ოქტომბერში დაიწყო, მას შემდეგ რაც ადიგენის გამგეობამ გადაწყვიტა მასში კულტურის სახლი მოეწყო და მის რეაბილიტაციაზე ტენდერი გამოაცხადა. ადგილობრივი მედია სამხრეთის კარიბჭის თანახმად, ადგილობრივი მუსლიმები ირწმუნებოდნენ, რომ ეს შენობა მეჩეთია და მის გადაცემას ითხოვდნენ, მართლმადიდებლები კი ამბობდნენ, რომ ეს სალოცავი ეკლესიის ქვებითაა აშენებული და მოქმედი არასდროს ყოფილა.