უკრაინის ომბუდსმენმა მიხეილ სააკაშვილის საკითხზე საერთაშორისო ორგანიზაციებს მიმართა. როგორც დენისოვა წერს, ექსპრეზიდენტის დედას შეხვდა და მიაწოდა ინფორმაცია სააკაშვილის უფლებების დასაცავად გადადგმულ ნაბიჯებზე.

ომბუდსმენის განცხდებით, უკრაინის მოქალაქის უფლებების დარღვევაზე აცნობა გაეროს ადამიანის უფლებათა უმაღლეს კომისარს, ეუთოს თავმჯდომარეს, ევროპის საბჭოს ადამიანის უფლებათა კომისარს, გაეროსა და ევროსაბჭოს წამების პრევენციის კომიტეტებს, უკრაინაში მოქმედ 9 საერთაშორისო უფლებადამცველ ორგანიზაციას და უკრაინაში მოქმედი უცხო სახელმწიფოების 78 დიპლომატიური მისიას.

"გამოვთქვი იმედი, რომ საერთაშორისო საზოგადოების ყურადღების გამახვილება მისი უფლებების დარღვევაზე უზრუნველყოფს მის სიცოცხლეს, უსაფრთხოებას, ადეკვატურ სამედიცინო მომსახურებას და სამართლიან სასამართლოს", — წერს დენისოვა.

უკრაინის სახალხო დამცველი საქართველოში პირველად 27 ოქტომბერს ჩამოვიდა. მან განაცხადა, რომ საზღვარზე 40 წუთით შეაყოვნეს და იქამდე არ შემოუშვეს, სანამ რამდენიმე პირთან არ დარეკა. ციხეში შესვლის შემდეგ დენისოვამ აღნიშნა, რომ დააფიქსირა უკირანის მოქალაქისა და საქართველოს ექსპრეზიდენტის, მიხეილ სააკაშვილის არაერთი უფლების დარღვევა რის შესახებაც აცნობებდა, საქართველოს იუსტიციის მინისტრს, უკრაინის პრეზიდენტს, უკრაინაში ევროპული ქვეყნების საელჩოებსა და ევროპარლამენტარებს. მმართველ გუნდში მისი განცხადებები გააკრიტიკეს — ექსომბუდსმენმა, სოზარ სუბარმა განაცხადა, რომ დენისოვას შეფასებები დიპლომატიურობის და ყველაფრის საზღვრებს სცილდება.

5 ნოემბერს დენისოვამ განცხადება გაავრცელა, სადაც დაგმო სააკაშვილის უფლებების დარღვევა და საერთაშორისო თანამეგობრობას დაუყოვნებლივი რეაგირებისკენ მოუწოდა. 11 ნოემბერს კი განაცხადა, რომ გლდანის ციხის კლინიკაში სააკაშვილის მოთავსების ვიდეო წამებისა და არასათანადო მოპყრობის ფაქტს ადასტურებს.

მეორედ დენისოვა საქართველოში 16 ნოემბერს ჩამოვიდა. ის სააკაშვილის სანახავად ციხეში არ შეუშვეს. იუსტიციის მინისტრმა, რატი ბრეგაძემ ეს იმით ახსნა, რომ გლდანის #18 დაწესებულება სამკურნალოა და თავს იკავებენ შეუშვან ის ადამიანები, ვისაც საქართველოს კანონმდებლობით ამის უფლება არ აქვს.

დენისოვას შეხვედრა სურდა თავად იუსტიციის მინისტრთანაც. ამაზე ბრეგაძე თქვა, რომ რომ სჯობდა დენისოვას შეხვედრა მაშინ ეთხოვა, როცა პირველად ჩამოვიდა და ცალმხრივი განცხადება გააკეთა.