ანალიტიკური ცენტრი "ჯეოქეისი" ოცნების პარლამენტში ინიცირებულ საკანონმდებლო ცვლილებას ეხმაურება, რომლის მიხედვითაც დაზვერვის სამსახური საქართველოს სახელმწიფო უსაფრთხოების სამსახურს დაექვემდებარება და ეროვნულ სადაზვერვო სააგენტოდ ჩამოყალიბდება.

მათ მიერ გავრცელებულ განცხადებაში ნათქვამია, რომ საგანგაშო ქმედებას, რაც სერიოზულ საფრთხეს შეუქმნის ქვეყნის ეროვნული უსაფრთხოების სისტემას და მის ინსტიტუციურ მოწყობას.

"ჯეოქისი" ქართულ ოცნებას მოუწოდებს, "არ გადადგას ეს უპასუხისმგებლო და ეროვნული ინტერესების საწინააღმდეგო ნაბიჯი, რომელიც დიდ დარტყმას მიაყენებს ქვეყნის ეროვნული უსაფრთხოების სისტემას".

"ქართული ოცნება გეგმავს საქართველოს დაზვერვის სამსახურის გაერთიანებას და დაქვემდებარებას საქართველოს სახელმწიფო უსაფრთხოების სამსახურთან, რაც წარმოადგენს საგანგაშო ქმედებას, რაც სერიოზულ საფრთხეს შეუქმნის ქვეყნის ეროვნული უსაფრთხოების სისტემას და მის ინსტიტუციურ მოწყობას.

საქართველოს დაზვერვის სამსახური 1997 წლიდან მოყოლებული დამოუკიდებელ სტრუქტურად ჩამოყალიბდა, რომელიც მნიშვნელოვან როლს ასრულებს ქვეყნის ეროვნული უსაფრთხოების უზრუნველყოფაში, კრიტიკული ინფორმაციის მოპოვებასა და საერთაშორისო პარტნიორებთან თანამშრომლობაში. წარსულში, სამსახურის სხვა უწყებასთან შერწყმამ გამოიწვია მისი ეფექტიანობის შემცირება და უწყებრივი დესტაბილიზაცია, რაც მალევე თავად იმჟამინდელმა ხელისუფლებამ აღიარა და გადაწყვეტილება უკან გაიწვია. მას შემდეგ, დაზვერვის სამსახური კვლავ დამოუკიდებელ უწყებად ჩამოყალიბდა და მასში განხორციელდა საგრძნობი ინვესტირება, როგორც საქართველოს ხელისუფლების, ასევე, საერთაშორისო პარტნიორების მხრიდან. მრავალწლიანი პროცესის მიზანი იყო დაზვერვის სამსახური ჩამოყალიბება დამოუკიდებელ, პოლიტიკურად მიუკერძოებელ და დასავლურ ღირებულებებსა და მუშაობის პრინციპებზე დაფუძნებულ ინსტიტუტად, რომელიც ჯეროვნად შეასრულებდა მასზე დაკისრებულ ფუნქცია-მოვალეობებს.

დაზვერვის სამსახურის შერწყმა სახელმწიფო უსაფრთხოების სამსახურთან, დიდი ალბათობით, გამოიწვევს სადაზვერვო საქმიანობის ეფექტიანობის კლებას, საქართველოს წინაშე არსებული გამოწვევების სათანადო ყურადღების გარეშე დარჩენას/ან სრულად გაქრობას და კვალიფიციური კადრების გადინებას. ეს, ასევე, საფრთხეს შეუქმნის დასავლურ სპეცსამსახურებთან თანამშრომლობას, რაც აისახება ინფორმაციის გაზიარების შემცირებაზე, კადრების გადამზადების შეჩერებასა და ნდობის ხარისხზე.

აღნიშნული ე.წ. რეფორმის შედეგად მოხდება სუს-ის ძალაუფლების მნიშვნელოვანი ზრდა, დაზვერვის სამსახურში ალტერნატიული ხედვისა და საქმიანი პროცესისათვის აუცილებელი განსხვავებული შეფასებების შეზღუდვა. საქართველოში არსებული პოლიტიკური რეალობიდან გამომდინარე, ე.წ. რეფორმა გამოიწვევს სამსახურის პოლიტიზებას, რაც კატეგორიულად ეწინააღმდეგება სადაზვერვო სამსახურების საქმიანობის საბაზისო პრინციპებს.

მაშინ როდესაც საქართველოს წინაშე დგას არაერთი კრიტიკული გამოწვევა და სასიცოცხლო მნიშვნელობა ენიჭება სახელმწიფოებრივი მედეგობის გაძლიერებას, სახეზეა ინსტიტუციური სისტემის მიზანმიმართული დასუსტების მცდელობა, რაც ერთიანობაში კიდევ უფრო მოწყვლადს გახდის საქართველოს ისედაც დასუსტებულ უსაფრთხოების სისტემას.

ზემოაღნიშნულიდან გამომდინარე, მოვუწოდებთ ქართულ ოცნებას არ გადადგას ეს უპასუხისმგებლო და ეროვნული ინტერესების საწინააღმდეგო ნაბიჯი, რომელიც დიდ დარტყმას მიაყენებს ქვეყნის ეროვნული უსაფრთხოების სისტემას.

მხარდაჭერას ვუცხადებთ საქართველოს დაზვერვის სამსახურის ღირსეულ და პროფესიონალ თანამშრომლებს, რომლებსაც სურთ ქვეყნის ინტერესებს ემსახურონ. სისტემიდან წამოსვლის შემთხვევაში, მზად ვართ მათ შევთავაზოთ ჩვენი პლატფორმა პროფესიული ხედვების გასაზიარებლად და უსაფრთხოების მიმართულებით მათი ცოდნისა და კონტაქტების გამოსაყენებლად", — ნათქვამია გავრცელებულ ინფორმაციაში.

"ჯეოქეისის" განცხადებას სოციალურ ქსელში საქართველოს მე-5 პრეზიდენტი სალომე ზურაბიშვილი გამოეხმაურა. ის წერს, რომ ამ ორი უწყების შერწყმის მაგალითები არსებობს რუსეთში, ბელარუსში, ჩრდილო კორეაში, თურქმენეთში, რაც მისი თქმით კითხვებს აჩენს.

"ამ ორი უწყების შერწყმის მაგალითები არსებობს შემდეგ ქვეყნებში: რუსეთი, ბელარუსი, ჩრდილო კორეა, თურქმენეთი…

ვინმეს კითხვა უჩნდება საითკენ მივდივართ!", — წერს ზურაბიშვილი.

• დაზვერვის სამსახური ეროვნულ სადაზვერვო სააგენტოდ ჩამოყალიბდება