ოცნების პრემიერმინისტრმა, ირაკლი კობახიძემ და თბილისის მერმა, კახა კალაძემ უნივერსიტეტისა და ქავთარაძის ქუჩების დამაკავშირებელი გვირაბი გახსნეს. კობახიძემ ჟურნალისტებთან საუბრისას თქვა, რომ "კალაძეს ძალიან ამბიციური გეგმები აქვს შემდეგი 4 წლისთვის".

"დარწმუნებული ვარ, რომ მომავალში ჩვენი ქალაქი კიდევ უფრო მეტად განვითარდება. მე ვიცი, რომ კახი კალაძეს აქვს ძალიან ამბიციური გეგმები შემდეგი 4 წლისთვის. ძალიან დახვეწილი გეგმა მზადდება ჩვენი დედაქალაქის განვითარებისთვის და დარწმუნებული ვარ, რომ 4 წლის თავზე ჩვენი დედაქალაქი იქნება კიდევ უფრო მეტად განვითარებული", — თქვა კობახიძემ.

ეს პირველი შემთხვევა არ არის, როცა ოცნების პრემიერმა ღიად გამოხატა კახა კალაძისადმი მხარდაჭერა თბილისის მერის არჩევნებში. მიმდინარე წლის 20 მარტს, ოცნების პრემიერმა, ირაკლი კობახიძემ "პირველ არხთან" ინტერვიუში განაცხადა, რომ თბილისის მერის არჩევნებში კახა კალაძის კანდიდატურა არის უალტერნატივო.

"რაც შეეხება თბილისის მერის არჩევნებს, კახა კალაძის კანდიდატურა არის უალტერნატივო. ვნახოთ, პოლიტიკური საბჭო რა გადაწყვეტილებას მიიღებს. თქვენ იცით, რომ მერობაზე არ არის არავითარი შეზღუდვა და საერთაშორისო პრაქტიკაც ეგ არის, ანუ განუსაზღვრელი რაოდენობით არის შესაძლებელი კენჭისყრა მუნიციპალიტეტის მერის პოზიციაზე. ნებისმიერ ქვეყანაში ასეა და ასეა საქართველოშიც. შეგვიძლია გავიხსენოთ ის საქმეები, რაც გაკეთდა თბილისში, სხვადასხვა მიმართულებით, მარტო რად ღირს რეკრეაცია, გამწვანების მიმართულება, ქუჩებისა და გამზირების მოწესრიგება. მიუხედავად იმისა, რომ ავტომობილების რაოდენობა გაზრდილია 3-ჯერ, 2012 წლის შემდეგ, რეალურად, მუდმივ რეჟიმში მიმდინარეობს მუშაობა იმისათვის, რომ ამან არ მოახდინოს მოძრაობის არსებითად ბლოკირება ჩვენს დედაქალაქში. ამისთვის სერიოზული ცვლილებები გატარდა ტრანსპორტის სფეროში და სამომავლოდაც ვფიქრობ, რომ ძალიან ძლიერი პროგრამა ექნება წარმოდგენილი კახა კალაძეს ამ მხრივ. შესაბამისად, ვფიქრობთ, რომ პირველ რიგში თბილისში და ყველა სხვა მუნიციპალიტეტში მოვიგებთ მერის არჩევნებს, საკრებულოს არჩევნებს", — თქვა კობახიძემ.