უნგრეთში საქართველოს საგანგებო და სრულუფლებიან ელჩად ტელეკომპანია "იმედის" ყოფილი დირექტორი ნიკოლოზ ლალიაშვილი დაინიშნა. მანამდე ის 2022 წლიდან ყაზახეთის რესპუბლიკაში საქართველოს საგანგებო და სრულუფლებიანი ელჩი იყო.

მანამდე ის იკავებდა სხვადასხვა პოზიციებს საქართველოს თავდაცვის სამინისტროსა და უშიშროების საბჭოში. ამას გარდა, ნიკოლოზ ლალიაშვილი იყო საქართველოს მე-7 მოწვევის პარლამენტის წევრი.

ნიკოლოზ ლალიაშვილი ტელეკომპანია "იმედის" დირექტორის თანამდებობაზე 2020 წლის ივლისიდან ერთი წლის განმავლობაში მუშაობდა. როგორც რადიო თავისუფლება წერს, ამ პოსტზე ყოფნის დროს ყოფილმა თანამშრომელმა იგი ტელევიზიაში ხელისუფლების გავლენების გატარებაში დაადანაშაულა.

ოცნების ხელისუფლების საგარეო საქმეთა სამინისტროს ცნობით, საქართველოს ახალი ელჩი ჰყავს იტალიაშიც.

იტალიის რესპუბლიკაში საქართველოს საგანგებო და სრულუფლებიანი ელჩისა და ქალაქ რომში განლაგებულ გაეროს საერთაშორისო ორგანიზაციებში (FAO, IFAD, WFP) საქართველოს მუდმივი წარმომადგენლის თანამდებობაზე თამარ ლილუაშვილი დაინიშნა.

თამარ ლილუაშვილი ამ დრომდე უნგრეთში საქართველოს საგანგებო და სრულუფლებიანი ელჩის პოზიციას იკავებდა, მანამდე კი იყო ბულგარეთის რესპუბლიკაში საქართველოს საგანგებო და სრულუფლებიანი ელჩი.

თამარ ლილუაშვილს საჯარო სექტორში მუშაობის დიდი გამოცდილება აქვს, მათ შორის იგი გახლდათ საქართველოს ეროვნული საინვესტიციო სააგენტო Invest in Georgia-ს აღმასრულებელი დირექტორი და "არ ემ ჯი" ჯგუფის დირექტორის მოადგილე.

საგარეო უწყების ცნობით, თამარ ლილუაშვილი და ნიკოლოზ ლალიაშვილი ახალ პოზიციებზე საქმიანობას 1 ივლისიდან დაიწყებენ.