15 მაისს, მოსკოვში 10 რუსი გამომცემელი დააკავეს "ლგბტ პროპაგანდის" შემცველი წიგნების გავრცელების სისხლის სამართლის ბრალდებით.

რუსეთის ფედერაციის საგამოძიებო კომიტეტის მიერ გავრცელებულ პრესრელიზში წერია, რომ მოსკოვში "ექსტრემისტული ორგანიზაციის წევრები დააკავეს". მათივე ცნობით, "გამოძიებამ დაადგინა, რომ 2023 წლის ნოემბრიდან 2024 წლის სექტემბრამდე, სამმა ბრალდებულმა ეგოისტური მიზნებიდან გამომდინარე გამოაქვეყნა და გაყიდა წიგნები, რომლებიც ხელს უწყობდა ლგბტ მოძრაობის საქმიანობას, რომელიც რუსეთში ექსტრემისტულ ორგანიზაციად არის აღიარებული".

მომხდარის შესახებ საგანგებო წერილი გაავრცელა გამომცემელთა საერთაშორისო ასოციაციამ (IPA). მათი ინფორმაციით, დაკავებული გამომცემლები მუშაობენ რუსეთში ყველაზე დიდ გამომცემლობა Eksmo-ში და მის შვილობილ კომპანია Popcorn Books-ში, რომლის 51%-იანი წილი 2023 წლის აგვისტოდან Eksmo-ს ეკუთვნის. დამოუკიდებელმა მედიასაშუალებამ The Insider-მა გამოაქვეყნა 50 წიგნის სია, რომელიც Eksmo-მ პარტნიორებს გაუზიარა და სთხოვა, რომ ისინი ადგილზე განადგურდეს ან უკან დაბრუნდეს“.

საერთაშორისო გამომცემელთა ასოციაციის პრეზიდენტი გვანცა ჯობავა აცხადებს, რომ "ლგბტ კანონების შემუშავება რუსეთსა და სხვა ქვეყნებში, როგორიცაა საქართველო და ბულგარეთი, აშკარად წარმოადგენს გამომცემლობის თავისუფლების შეზღუდვას და გამომცემლები ყურადღებით უნდა იყვნენ თავიანთ ქვეყნებში მსგავსი კანონების შემუშავების მიმართ და აქტიური წინააღმდეგობა გაუწიონ".

საერთაშორისო გამომცემელთა ასოციაციის (IPA) გამომცემლობათა თავისუფლების კომიტეტის თავმჯდომარის, კრისტენ ეინარსონის განცხადებით, "ეს დაპატიმრებები აჩვენებს იმ რისკებს, რომელთა წინაშეც გამომცემლები ახლა რუსეთში დგანან. ჩვენ მხარს ვუჭერთ ჩვენს დაკავებულ კოლეგებს და მოვუწოდებთ ხელისუფლებას, მოხსნას ნებისმიერი ბრალდება. რუსი მკითხველები უფრო მდიდრები არიან მრავალფეროვანი წიგნებით, რაც საუკეთესოდ უზრუნველყოფს გამოცემის რეალურ თავისუფლებას".

"ლგბტ პროპაგანდა" არ არსებობს. ეს გამოგონილი, ცრუ ცნება თავადაა ნაწილი თავსმოხვეული პროპაგანდისტული ნარატივისა, რომელიც ლგბტქ ადამიანების მიმართ ირაციონალური შიშისა და ზიზღის დათესვას ისახავს მიზნად. ამ სტრატეგიას წარმატებით იყენებენ ოკუპანტ რუსეთში ცენზურის დასაწესებლად, ადამიანის უფლებების შესალახად და დასავლური სახელმწიფოების მიმართ სიძულვილის გასაღვივებლად.