სახელმწიფო უსაფრთხოების სამსახურთან (სუს) ნაციონალური მოძრაობის მიერ ორგანიზებულ მიხეილ სააკაშვილის მხარდამჭერი აქციის დაწყებამდე რამდენიმე ადამიანი დააკავეს. დაკავებულების რაოდენობა უცნობია, თუმცა აქციის მონაწილეები ამბობენ, რომ დაკავებულია 10-მდე ადამიანი. On.ge ამის გარკვევას შინაგან საქმეთა სამინისტროსთან ცდილობს.

ადგილზე მისულ საპატრულო პოლიციის დეპარტამენტის უფროსს ჟურნალისტებმა დაკავების მიზეზი ჰკითხეს, რაზეც მან თქვა, რომ სახელმწიფო დაწესებულების შენობის ბლოკირება კანონით აკრძალულია.

გუშინ, 9 ნოემბერს ყოფილი პრეზიდენტის მიხეილ სააკაშვილის სამოქალაქო კლინიკაში გადაყვანის მოთხოვნით 3 სხვადასხვა ადგილას აქცია დაიგეგმა. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან შეიკრიბნენ.

დღესვე იგეგმება კიდევ ერთი აქცია, თუმცა ნაციონალური მოძრაობის თავმჯდომარემ, ნიკა მელიამ ადგილი არ დაასახელა.

მისივე თქმით, თუ ექსპრეზიდენტის, მიხეილ სააკაშვილის პროცესი გაიმართება ისე, როგორც დაგეგმილია, მაშინ 11-საათიანი აქციების შემდეგ, საქალაქო სასამართლოსთანაც შეიკრიბებიან.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში 8 ნოემბერს გადაიყვანეს.