ჯანდაცვის მინისტრის მოადგილის, თამარ გაბუნიას განცხადებით, ბუსტერ დოზის გაკეთება 18 წლის ზემოთ ყველას შეეძლება. გადაწყვეტილება დღეს იმუნიზაციის საბჭომ მიიღო.

"ბუსტერ დოზის გამოყენება შესაძლებელი იქნება 18 წლის ზემოთ ნებისმიერი პირისთვის, რომელიც აცრილია ნებისმიერი ვაქცინით. თუ პირი აცრილია სინოფარმითა და სინოვაკით, შეუძლია, გამოიყენოს სინოფარმისა და სინოვაკის ვაქცინა ბუსტერ დოზისთვის ან გაიკეთოს Pfizer-ის დოზა. AstraZeneca-ს შემთხვევაში, 6 თვის შემდეგ, პირს დამატებით შეუძლია გაიკეთოს Pfizer-ის დოზით ბუსტერ დოზა და რაც შეეხება Pfizer-ით აცრილებს, მათთვის, ბუნებრივია, რეკომენდებულია მეორე აცრიდან 6 თვეში Pfizer-ის დოზის გამოყენება", — განაცხადა მან.

ამასთან, მისი თქმით, არის გამონაკლისი, რომელიც 60 წლის ზემოთ ასაკის სინოფარმითა და სინოვაკით აცრილ პირებს შეეხებათ. კერძოდ, გაბუნიას თქმით, ისინი ბუსტერ დოზის მიღებას შეძლებენ მეორე აცრიდან 3 თვეში.

"ერთი დაზუსტება, რომელიც ითვალისწინებს 60 წლის ზემოთ პირებში, რომლებიც აცრილები არიან სინოფარმითა და სინოვაკით, ბუსტერ დოზის გამოყენების შესაძლებლობას, არა 6 თვის შემდეგ, არამედ მეორე აცრიდან 3 თვიდან 6 თვის ინგტერვალში", — განაცხადა მან.

აღსანიშნავია, რომ ბუსტერ დოზა შეიძლება იყოს იგივე ან სხვა ვაქცინა — სინოფარმი, სინოვაკი, ფაიზერი. რაც შეეხება ასტრაზენეკას, თამარ გაბუნიას განმარტებით, ამ ვაქცინით ბუსტერი არ კეთდება, თუმცა ასტრაზენეკათი აცრილებს შეუძლიათ ბუსტერად გაიკეთონ ფაიზერი.

დღეს იმუნიზაციის საბჭომ 12-დან 15 წლამდე ასაკის ბავშვებში Pfizer-ის ვაქცინა დაუშვა. გაბუნიას თქმით, ამ ასაკის ბავშვებს შეძლებენ, რომ მშობლის თანხმობით საფუძველზე, Pfizer-ის ორი დოზით აიცრან.

გარდა ამისა, 8 ნოემბერს საკოორდინაციო საბჭომ მიიღო გადაწყვეტილება, რომ პირველი დეკემბრიდან ე.წ. მწვანე პასპორტები ამოქმედდეს. როგორც პრემიერმინისტრმა, ირაკლი ღარიბაშვილმა ბრიფინგზე ისაუბრა, დეკემბრიდან მოქალაქეები კონკრეტულ დაწესებულებებში მწვანე პასპორტების გარეშე ვეღარ შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.

• დაწესებულებები, სადაც მწვანე პასპორტის გარეშე ვერ შეხვალთ — სია

საქართველოში ამ დროისთვის 3 სხვადასხვა ვაქცინაა ხელმისაწვდომი. უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.