Stranger Things-ის მეოთხე სეზონის მოლოდინს სერიალის შემქმნელები კიდევ ერთი თიზერით გვიმძაფრებენ. ნეტფლიქსის ერთ-ერთი ყველაზე პოპულარული სერიალის ახალ სეზონში, როგორც ჩანს, კიდევ უფრო დაძაბულ ამბებს უნდა ველოდოთ.

ახალ თიზერში ილევენი მაიკს წერილს სწერს და უყვება, როგორ მოსწონს სკოლა და ახალი მეგობრები (არადა, კადრებში მის მიმართ არაკეთილგანწყობილ კლასელებს ვხედავთ), თუმცა, მას მაინც ერთი სული აქვს, როდის დადგება გაზაფხულის არდადეგები, რომ ერთმანეთი ისევ ნახონ. მაგრამ... მერე რაც ხდება თიზერში, ნამდვილ ჰოლივუდურ ექშენ ფილმს მოგაგონებთ: სროლა, აფეთქებები, ვერტმფრენები, პოლიცია. მოკლედ, ერთდროულად რამდენიმე კითხვის ნიშანი უკვე გაჩნდა.

თრეილერი, სახელწოდებით "კეთილი იყოს თქვენი მობრძანება კალიფორნიაში" სერიალის მეოთხე სეზონის რიგით ასევე მეოთხე თიზერია. ოთხივე მათგანი მიუთითებს, რომ სიუჟეტის მოქმედება ჰოუკინსის საზღვრებს სცდება.

უკვე 4 თიზერის ნახვის მიუხედავად, Stranger Things-ის ახალი სეზონის გამოსვლის ზუსტი თარიღი ჯერ კიდევ უცნობია. ნეტფლიქსმა მხოლოდ ის დაადასტურა, რომ პოპულარული სერიალის დაბრუნებას 2022 წლისთვის უნდა ველოდოთ.

Stranger Things-ის ამ დროისათვის ბოლო, მესამე სეზონი, 2019 წელს გამოვიდა. როგორც ცნობილია, უჩვეულოდ ხანგრძლივი პაუზის მიზეზი კორონავირუსის პანდემიის გამო გადადებული გადაღებები გახდა.

იხილეთ წინა თიზერები: