ასტრაზენეკას ვაქცინის 17 000-მდე დოზას ვადა გაუვიდა, აქედან 15 000 დოზა დონაციით იყო მიღებული. ამის შესახებ დაავადებათა კონტროლის ეროვნული ცენტრის ხელმძღვანელი, ამირან გამყრელიძე საუბრობს. მისი თქმით, ასტრაზენეკას ძირითად დოზებს ვადა სექტემბრისა და ოქტომბრის ბოლოს გასდიოდა. გამყრელიძე აღნიშნავს, რომ მოწოდებების მიუხედავად, ყველა დანარჩენ სამ ვაქცინასთან შედარებით, ასტრაზენეკაზე მოთხოვნა დაბალი იყო.

"ის დოზები, რომლებსაც გაუვიდა ვადა და ასეთი იყო დაახლოებით 3 900 დოზა, ასევე, რომელსაც ოქტომბერში გასდიოდა ვადა, დარჩა დაახლოებით 13 500 დოზა, ანუ სადღაც ერთად აღებული ეს გახლავთ 17 000-მდე დოზა, სამწუხაროდ, გამოუყენებელი დარჩა და ჩამოიწერება. აქედან 15 000 დოზა არის მიღებული დონაციით. დონაციით ორჯერ მივიღეთ, პირველი 5 000 დონაცია იყო ივლისის დასაწყისში და მეორე გახლდათ აგვისტოს შუა რიცხვებში, თუ არ ვცდები", — განაცხადა გამყრელიძემ.

მისივე განმარტებით, სინოფარმსა და სინოვაკს 2-დან 3 წლამდე აქვს ვადა, ხოლო ასტრაზენეკასა და ფაიზერს, ძირითადად, 6 თვე. გამყრელიძემ კიდევ ერთხელ აღნიშნა, რომ კვლევების შედეგად, ფაიზერმა მიიღო გადაწყვეტილება და ფაიზერის ყველა ვაქცინას, რომელიც ინახება -60-დან -90 გრადუსამდე ტემპერატურაზე, მოქმედების ვადა სამი თვით გაუგრძელდა.

საქართველოში ვაქცინაციის პროცესი 2021 წლის 15 მარტს, სწორედ ასტრაზენეკას ვაქცინით დაიწყო. მედპერსონალის შემდეგ ვაქცინაციის პროცესში 65 წელს ზევით მოქალაქეები 25 მარტიდან ჩაერთნენ. ვაქცინაციის პროცესში 2 აპრილიდან ჩართნენ 55 წლის ზევით ასაკის მოქალაქეებიც, მაისიდან კი ამ ვაქცინით აცრა 45 წლიდან მოქალაქეებსაც შეეძლოთ.

ამ ეტაპისთვის საქართველოში ვაქცინაცია სამი ვაქცინით — ფაიზერით, სონოფარმითა და სინოვაკით არის შესაძლებელი.