საქართველოს საკონსტიტუციო სასამართლომ არაკონსტიტუციურად ცნო ფუნდამენტური კვლევებისთვის სახელმწიფო სამეცნიერო გრანტების კონკურსში წარდგენილი პროექტების შემფასებელ დამოუკიდებელ ექსპერტთა ვინაობის კონფიდენციალურობა. ამით საქართველოს მოქალაქის გიორგი კრავეიშვილის კონსტიტუციური სარჩელი დაკმაყოფილდა. საქმეს მერაბ ტურავა, ლალი ფაფიაშვილი, გიორგი კვერენჩხილაძე და მაია კოპალეიშვილი განიხილავდნენ.

სასამართლომ განმარტა, რომ სახელმწიფო დაწესებულებებში დაცული საჯარო ინფორმაციის ღიაობა სახელმწიფო ორგანოების საქმიანობაზე ეფექტიანი საზოგადოებრივი კონტროლის მნიშვნელოვანი წინაპირობაა. მანვე მიიჩნია, რომ კონკურსის განმავლობაში და მისი დასრულებისას ექსპერტის ვინაობის გაუმჟღავნებლობა ინფორმაციის ხელმისაწვდომობის უფლების შეზღუდვას ნიშნავს.

„ექსპერტის საქმიანობის საჯარო ბუნებიდან გამომდინარე, მისი ვინაობა ვერ მიიჩნევა პირის კერძო საკითხებთან დაკავშირებულ ინფორმაციად, რადგან დამოუკიდებელი ექსპერტის ვინაობა წარმოადგენს საჯარო (სახელმწიფო) დაწესებულებაში არსებულ საჯარო ინფორმაციას, რომლის ხელმისაწვდომობაზეც ვრცელდება საქართველოს კონსტიტუციით განმტკიცებული ინფორმაციის თავისუფლების პრინციპები,” - აღნიშნულია საქართველოს საკონსტიტუციო სასამართლოს მიერ გავრცელებულ პრესრელიზში.

სასამართლომ მიიჩნია, რომ ექსპერტის ვინაობის ცოდნა მნიშვნელოვანია, მის მიერ გაკეთებული დასკვნის შესაფასებლად.

„სამეცნიერო ფონდის მიერ გადაწყვეტილების მიღებისას ინტერესთა კონფლიქტის არსებობა, ექსპერტის მიუკერძოებლობა და კომპეტენტურობა მოიცავს იმ საკითხებს, რომელთა შესახებ ინფორმაციის მიღება შესაძლოა, წარმოადგენდეს დაინტერესებული პირის, საზოგადოების ინტერესის საგანს,“- აღნიშნა სასამართლოს კოლეგიამ.