ევროკომისიის აღმოსავლეთ სამეზობლოსთან ურთიერთობისა და ინსტიტუციურ მშენებლობაზე პასუხისმგებელი დირექტორი, ლორენს მერედიტი აცხადებს, რომ ევროკავშირის მხრიდან განხორციელებულ ინვესტიციებს თან უნდა სდევდეს მკაფიო პროგრესი სასამართლო რეფორმის, საჯარო მმართველობის, ადამიანის უფლებათა სფეროში. ქვეყანაში განსახორციელებელ პროექტებზე მან საქართველოში ევროკავშირის წარმომადგენლობის ოფისში ისაუბრა.

"ჩვენი ვიზიტის ფარგლებში წამოვიწყებთ 5 სხვადასხვა პროექტს საქართველოში. პირველი ეხება შავ ზღვას, სადაც ჩვენ განვიხილავთ როგორც კავშირების განვითარებას, ასევე, ციფრულ კავშირებს. რაც შეეხება ციფრულ წიგნიერებას, ჩვენ დავეხმარებით 1 000 სასოფლო თემს, მიიღოს ყველამ წვდომა მაღალსიჩქარიან ინტერნეტზე, რათა დავრწმუნდეთ, რომ საქართველო მოყვება გლობალური ტექნლოგოიების ტემპს და ამას აკეთებს ინკლუზიურად მოქალაქეებზე ორიენტირებული გზით", — განაცხადა მერედიტმა.

მისივე თქმით, შემდეგი საკითხი ეხება ინოვაციებს, მცირე და საშუალო საწარმოების განვითარებას.

"ჩვენ დავეხმარებით 80 000-ს მცირე და საშუალო საწარმოს და დავეხმარებით მათ, რომ მაქსიმალურად გამოიყენონ ევროკავშირი-საქართველოს ღრმა და ყოვლისმომცველი თავისუფალი სავაჭრო სივრცის პოტენციალი ამ საკითხებთან დაკავშირებით", — თქვა მან.

შემდეგი ეხება ჰაერის ხარისხს. ევროკომიის წარმომადგენელმა აღნიშნა, რომ როგორც დიდ ქალაქებში, თბილისში, ასევე, სხვა ქალაქებში ეს არის პრობლემა, ამიტომ, მათი ძალისხმებით მილიონ მოქალაქეს მიეცემა საშუალება გარემოს დაცვის სფეროში ჩვენი ძალისხმევის გაძლიერებით ქვეყანაში უფრო სუფთა ჰაერით ისუნთქოს.

"ჩვენ პირდაპირ ვეხმარებით მოქალაქეებს მთელი საქართველოს მასშტაბით. ევროკავშირის დახმარება საქართველოსთვის ორ საყრდენს ემყარება, ეს არის ინვესტიცია და მმართველობა და დახმარება ორივე მიმართულებით. ჩვენი მხრიდან განხორციელებულ ინვესტიციებს თან უნდა სდევდეს მკაფიო პროგრესი სასამართლო რეფორმის, საჯარო მმართველობის, ადამიანის უფლებათა სფეროში", — განაცხადა მერედიტმა.

მან, ასევე, დასძინა, რომ ეს არის ევროკავშირის ძირითადი ღირებულებები და სჯერათ, რომ მმართველობის რეფორმები აუცილებელია, არა მხოლოდ საქართველოს დემოკრატიული დღის წესრიგის წინ წაწევისთვის, არამედ მდგრადი ეკონომიკური განვითარებით უზრუნველსაყოფად, თანაბარი საასპარეზო პირობების შესაქმნელად, ინვესტორების მოსაზიდად და საბოლოო ჯამში საქართველოს ყველა მოქალაქისთვის სარგებლის მოსატანად.