დაავადებათა კონტროლის ცენტრის დირექტორის, ამირან გამყრელიძის განცხადებით, მოსალოდნელია, ეპიდსიტუაციის კიდევ უფრო გაუარესება.

"სამოქალაქო პასუხისმგებლობა ჩვენ, სახელმწიფოებრივი პასუხისმგებლობა ჩვენი თანამემამულეების წინაშე გახლავთ ეს, რომ ყველამ გავითავისოთ, რომ სერიოზულად უარესდება ეპიდსიტუაცია. ყველამ რომ ვატაროთ პირბადე, ეს ხომ არის უმარტივესად შესასრულებელი რეკომენდაცია. ყველამ შინ და გარეთ ვატაროთ პირბადე. იცავს ეს პირბადე. მეორე — დავიცვათ დისტანცია და თავი ავარიდოთ ყოველგვარ დიდ შეკრებებს, რა მიზეზითაც ეს რ უნდა იყოს.

წავიდეთ და ავიცრათ, ბატონებო, ერთმანეთისთვის ავიცრათ, ქვეყნისთვის ავიცრათ იმიტომ, რომ სხვანაირად გვექნება მძიმე ნოემბერი ძალიან, დამიჯერეთ. მძიმე ნოემბერი, რომელიც ვის უნდა? სიკვდილიანობის მაღალი რიცხვები ქვეყანაში. 1,8 რეპროდუქციის ინდექსი რომ გაქვს, ეს არის ძალიან საგანგაშო, ანუ გავრცელება ძალიან სწრაფია, ამიტომ მოსალოდნელია, რომ კიდევ უფრო გაუარესდეს ეპიდსიტუაცია", — განაცხადა გამყრელიძემ რუსთავი 2-ის ეთერში.

17 ოქტომბრის მონაცემებით, საქართველოში კორონავირუსის 4 581 ახალი შემთხვევა დადასტურდა, გამოჯანმრთელდა 2 494, ხოლო გარდაიცვალა — 28 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 662 334-ს, მათგან გამოჯანმრთელდა — 612 481, ხოლო ვირუსს ჯამში ემსხვერპლა 9 468 ადამიანი.