დღეიდან კორონავირუსის საწინააღმდეგო ვაქცინაციის პროცესში 12-დან 15 წლამდე, ქრონიკული დაავადებების მქონე მოზარდებიც ჩაერთვნენ. ჯანდაცვის მინისტრის მოადგილის, თამარ გაბუნიას ინფორმაციით, აცრა შეეძლებათ ამ ასაკის იმ მოზარდებსაც, ვისაც პირველი დოზა უცხოეთში აქვთ გაკეთებული.

"დაიწყო უკვე ვაქცინაცია დღეიდან 12-დან 15 წლამდე ქრონიკული დაავადების მქონე ბავშვების. ასევე, იმ ბავშვების, 1-ლი დოზა უცხოეთში აქვს ჩატარებული და დაბრუნდა ქვეყანაში, ან პირიქით, მიემგზავრება მისი ოჯახი იმ ქვეყანაში, სადაც ბავშვების ვაქცინაცია უკვე ფართოდ დანერგილი პრაქტიკაა", — განაცხადა გაბუნიამ იმედის ეთერში.

მინისტრის მოადგილე ამბობს, რომ მოზარდებში დელტა შტამის აქტიური გავრცელების მიუხედავად, ჩვეულებრივ, ის ამ ასაკში შედარებით მსუბუქად მიმდინარეობს. შესაბამისად, უწყება არ ცდილობს საყოველთაო ვაქცინაციის ასაკის დაწევას. გაბუნიას თქმით, 12-15 წლის მოზარდებისთვის საყოველთაო ვაქცინაცია დღის წესრიგში მომდევნო 1-2 თვის განმავლობაში დადგება.

"ჯერჯერობით, ექსპერტების ჯგუფი არ ჩქარობს საყოველთაო ვაქცინაციის დაწყებაზე [გადაწყვეტილების მიღებას] ამ ჯგუფში. ეს ეტაპიც დადგება, ბუნებრივია. ჩვენ კიდევ გავიზიარებთ სხვა ქვეყნების გამოცდილებას, ჯანმრთელობის მსოფლიო ორგანიზაციის რეკომენდაციებს ბავშვების ვაქცინაციასთან დაკავშირებით, თუმცა, დღეს უკვე გამოცდილების, განწყობის და ყველაზე მაღალი რისკების დაძლევის მიზნით დაიწყო უკვე ვაქცინაცია იმ ბავშვებისთვის, ვისაც აქვს ქრონიკული დაავადებები", — ამბობს გაბუნია.

თამარ გაბუნიას თქმით, მშობლების მიმართვის და ჯანმრთელობის მდგომარეობის გათვალისწინებით, აქამდეც აიცრა 12-15 წლის რამდენიმე მოზარდი. დღეიდან კი, როგორც უკვე აღვნიშნეთ, ქრონიკული დაავადების მქონე ამ ასაკის ყველა მოზარდს შეუძლია ვაქცინის გაკეთება.

გაიგე მეტი: