მსოფლიოში ცნობილმა სათამაშოების მწარმოებელმა კომპანია Lego-მ თავისი პროდუქციიდან გენდერული სტერეოტიპების აღმოფხვრის გადაწყვეტილება მას შემდეგ მიიღო, რაც ახალი გლობალური კვლევის შედეგად დადგინდა, რომ ბავშვებში თამაშსა და მომავალ კარიერას შორის მიმართება უთანასწორო და შემზღუდავია.

კვლევის მიხედვით, თამაშისას გოგოები უფრო თავდაჯერებულები ხდებიან და სხვადასხვა აქტივობაში ჩართვის დიდ სურვილს ამჟღავნებენ, თუმცა ბიჭების შემთხვევაში იგივე არ ხდება.

გამოკითხული ბიჭების 21% ფიქრობს, რომ მათ დასცინებენ, თუ "გოგოს სათამაშოებით" დაინტერესდებიან, რაც უმეტესად მშობლების მიმართ შიშს უკავშირდება. "მშობლების უმეტესობა იმაზე ღელავს, რომ მათ ბიჭებს უფრო დასცინებენ გენდერთან შეუფერებელი სათამაშოს გამოყენებისთვის, ვიდრე გოგოებს", — ამბობს ერთ-ერთი მკვლევარი.

მკვლევრების მიხედვით, ამ ასიმეტრიის მიზეზი ის არის, რომ გოგოებს მოვუწოდებთ ბიჭების ნივთებით ითამაშონ, ხოლო ბიჭებს — არა. "თუ გოგოები არ ითამაშებენ ლეგოთი ან სხვა სამშენებლო სათამაშოებით, მაშინ ისინი ვერ განივითარებენ იმ სივრცით უნარებს, რომლებიც მათ შემდგომ ცხოვრებაში დაეხმარება. ასევე, თუ თოჯინები მხოლოდ გოგოებისთვის იქნება განკუთვნილი, მაშინ ბიჭები აღზრდის უნარებს ვერ გამოიმუშავებენ", — დასძენს ნეირობიოლოგი ჯინა რიპონი.

ტრადიციულად, ლეგო ბიჭებში უფრო პოპულარული იყო, მაგრამ სათამაშოების ზოგიერთი ხაზი ორივე გენდერის ბავშვებისთვისაა განკუთვნილი. ახლა კი ლეგოს მიზანია, რომ გოგოებსა და ბიჭებსა სხვადასხვა ტიპის უნარების განვითარებას თანაბრად შეუწყოს ხელი.

Lego.com-ზე სათამაშოები აღარ არის დახარისხებული "გოგოებისა" და "ბიჭების" კატეგორიებში. ამის ნაცვლად, მომხმარებლებს სასურველი სათამაშოს ძიება მათთვის განსაკუთრებით საინტერესო კატეგორიების მიხედვით შეუძლიათ.

"ჩვენი ამოცანაა, ბიჭები და გოგოები წავახალისოთ, რომ ის სათამაშოები აირჩიონ, რომლებიც ტრადიციულად "არ იყო მათთვის განკუთვნილი", — ამბობს ლეგოს მარკეტინგის სპეციალისტი ჯულია გოლდინი.