ირანსა და აზერბაიჯანს შორის ბოლო დღეებში დაძაბულობა მკვეთრად გაიზარდა. ირანელმა სამხედროებმა ნახიჩევანის საზღვართან ახლოს სამხედრო წვრთნები გამართეს. ისლამური რესპუბლიკის სულიერი ლიდერი ალი ხამენეი თავის ჩრდილოელ მეზობელს "მსუბუქად დამუქრა".

"ვინც ძმებს ხვრელს გაუთხრის, პირველი ჩავარდება მასში", — 3 ოქტომბერს დაწერა ხამენეიმ ტვიტერზე.

წინა დღეს, სამხედრო წვრთნების დაწყებისთანავე, ირანის საგარეო საქმეთა მინისტრმა, ჰუსეინ ამირ აბდულაჰიანმა ადგილობრივ საინფორმაციო არხს განუცხადა, რომ "სიონისტები" აზერბაიჯანის ზოგიერთ რაიონში იმყოფებოდნენ, როცა "ტერორისტული ჯგუფები" ირან-აზერბაიჯანის საზღვართან მიახლოებას წარუმატებლად ცდილობდნენ.

4 ოქტომბერს აზერბაიჯანის პრეზიდენტმა, ილჰამ ალიევმა თეირანის განცხადებებს უპასუხა.

"ცოტა ხნის წინ, ირანელმა პროვინციელებმა პირი დააღეს და აზერბაიჯანს ცილი დასწამეს, მაგრამ ბაქომ ამას ყურადღება არ მიაქცია. დაე, გაახილონ თვალები და შეხედონ, სად ნახეს ისრაელი? ჩვენ არავის მივცემთ უფლებას, ცილი დაგვწამოს", — განუცხადა ალიევმა ჟურნალისტებს ჯაბრაილის რეგიონში ვიზიტისას.

5 ოქტომბერს აზერბაიჯანის ხელისუფლებამ ქვეყანაში ირანის უმაღლესი სუსულიერო ლიდერის, ხამენეის წარმომადგენლის, ოჯაგ ნეკატის ბაქოს ოფისის დახურვის შესახებ განაცხადა, სავარაუდოდ, COVID-19-ის მიზეზით.

ორ მეზობელ ქვეყანას შორის დაძაბულობა მას შემდეგ დაიწყო, რაც აზერბაიჯანმა მის მიერ კონტროლირებად კაპანი-გორისის გზის მონაკვეთებზე მოძრავი ირანული სატვირთო მანქანების გაჩერება და საბაჟო გადასახადების დაწესება დაიწყო.

როგორც ბაქოში დაფუძნებული დამოუკიდებელი კვლევითი ცენტრის, კავკასიის პოლიტიკური ანალიზის ცენტრის დირექტორი, აჰმად ალილი OC Media-სთან ამბობს, ნაკლებად სავარაუდოა, რომ ბოლოდროინდელი სიტყვების ომი რეალურ სამხედრო დაპირისპირებაში გადაიზარდოს.

"ირანმა კარგად იცის, რომ აზერბაიჯანთან ნებისმიერი სამხედრო დაპირისპირებამ შეიძლება ისრაელის, დასავლეთისა და შეერთებული შტატების ერთობლივი ალიანსი გამოიწვიოს. მე არ ვფიქრობ, რომ ირანი ასეთი რისკისთვის მზად არის", — თქვა ალილიმ.

მისივე განცხადებით, აზერბაიჯანსა და ირანს შორის პერიოდული შეტაკებები მედიაში გაგრძელდება. პოლიტოლოგის აზრით, ეს განსაკუთრებით მნიშვნელოვანია, რადგან ბოლო დროს 81 წლის ხამენეის მემკვიდრის საკითხი სულ უფრო მწვავედ დგას — სწორედ ამ მემკვიდრემ უნდა ჩაანაცვლოს ის როგორც ქვეყნის სულიერ წინამძღოლის, ისე ქვეყნის მმართველის პოსტზე.

მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გამოქვეყნდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.