ფარული საგამოძიებო მოქმედებების შესახებ კანონზე, პრეზიდენტის შენიშვნების განხილვისას, უმრავლესობის დეპუტატმა, გედევან ფოფხაძემ განაცხადა, რომ პრეზიდენტის ლოგიკა - კერძო კომპანიებს სახელმწიფომ ფული გადაუხადოს ფარული მიყურადებისთვის, ზიანს აყენებს სახელმწიფოს უსაფრთხოებას:

"პრეზიდენტი კომერციულ იურიდიულ სისტემას ეუბნება: იმისათვის, რომ სახელმწიფოს ემსახურო და დაიცვა მისი ინტერესი, უნდა გამოართვა ფული სახელმწიფოს. ფული მოაკელი ბიუჯეტს, რაღაც სხვა ინტერესს. მე მახსენდება ჩვენი პოლიტიკური ოპოზიცია, ადრე რომ ხელისუფლებაში იყო, იგივე ადამიანებს როგორ იჭერდა და როგორ ართმევდა ფულს, ანუ ჩვენ უნდა წავართვათ პენსიონებს ფული და მივცეთ მაგთის, ხო? ასეთი ლოგიკაა პრეზიდენტის მხრიდან შემოთავაზებული".

1 მარტს მესამე მოსმენით, 87 ხმით 2-ის წინააღმდეგ მიიღო კანონი. ცვლილებების მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი - საქართვლოს ოპერატიულ-ტექნიკური სააგენტო.

პრეზიდენტი გამოყოფს ორ ფუნდამენტურ პრობლემას აღნიშნულ კანონში და ესენია:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას.
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს".

სატელეკომუნიკაციო კომპანია მაგთიკომის ერთ-ერთი მფლობელი, გია ჯოხთაბერიძე მიიჩნევს, რომ კომპანიებს უნდა ჰქონდეთ ინფორმაციის მოპოვების საშუალებები, თუმცა ინფორმაციის წაღების მექანიზმი მათ ხელში არ უნდა იყოს. მისივე თქმით, მას სურს თავისუფალი იყოს ბიზნესის კუთხით. ბიზნესით, რომელიც ქმნის ბიუჯეტს.