ოკუპირებული ცხინვალის რეგიონში კორონავირუსის გამოვლენილი შემთხვევების გამო სოფლის კიდევ ორი სკოლა დაიხურა. ადგილობრივი მთავარი სანიტარული ექიმის, მარინა კოჩიევას თქმით, ჯავის და მუგუთის საშუალო სკოლები ორკვირიან კარანტინზე გადავიდნენ.

კოჩიევას თქმით, აქამდე დაიხურა მე-6, მე-9 საშუალო სკოლები, კადეტთა სკოლა, პანსიონატი და სოფელ ზაყორის სკოლა, სხვა სკოლებში კლასების ნაწილი და ჯგუფები საბავშვო ბაღებში.

ოკუპირებული ცხინვალის რეგიონში ბოლო 24 საათის განმავლობაში, კორონავირუსის 53 ახალი შემთხვევა დაფიქსირდა, გამოჯანმრთელდა 10 ადამიანი.

აქტიური ინფიცირების შემთხვევა ამ დროისათვის 1 097-ს შეადგენს, საავადმყოფოში 80 კოვიდ პაციენტი მკურნალობს. უცნობია, რამდენად ზუსტია ეს მონაცემები, რადგან საქართველოს ცენტრალურ ხელისუფლებას რეგიონიდან ზუსტი ინფორმაცია არ აქვს.

დე ფაქტო ჯანდაცვის უწყების განცხადებით, დღემდე ინფიცირების 6 367 შემთხვევაა დაფიქსირებული, მათ შორის გამოჯანრთელდა 5270 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: