პარტია დროას ლიდერი ელენე ხოშტარია აცხადებს, რომ 2 ოქტომბრის არჩევნებზე თბილისის 26 უბანზე მეტობა დააფიქსირეს. ხოშტარია, ასევე, ამბობს, რომ 200-ზე მეტი უბნის გადათვლა მოითხოვეს. მისი თქმით, თბილისის საკრებულო, რომელიც დღეს ტექნიკურად, ორი ხმით უპირატესობა აქვს ქართულ ოცნებას, რეალურად ოპოზიციას ეკუთვნის.

"თბილისის საკრებულოში, თბილისის საზოგადოებამ აირჩია ოპოზიცია. სწორედ იმიტომ, რომ ეს რეალობა დაემახინჯებინათ და შეეცვალათ, ქართულმა ოცნებამ მიიტაცა, როგორც მინიმუმ, ის ორი ადგილი და იმდენი პროცენტი, რამდენიც აუცილებელი იყო ამ შედეგების შესაბრუნებლად.

თბილისის პროპორციულ ნაწილში, ბიულეტენების 40%-ში არის დისბალანსი, რაც ნიშნავს იმას, რომ იქ რაღაც გააყალბეს, რაღაც ფორმით და შემდეგ ქაღალდზე ვეღარ გააფორმეს, ვერ დააჯამეს მოსულთა და იმათი რაოდენობა, ვინც მისცა ხმა. მეტობა არის 26 უბანზე, რაც ნიშნავს იმას, რომ ბიულეტენები უტყუარად არის ჩაყრილი. საკამათოც არ არის, იმდენად სწრაფად უნდა გაუქმდეს ეს უბნები", — აცხადებს ელენე ხოშტარია.

ის, ასევე, ამბობს, რომ 272 უბანზე ნაკლებობა დააფიქსირეს. მისივე თქმით, მათ, ასევე, 15 026 ბათილი ბიულეტენი აქვთ პროპორციულ ნაწილში.

"ჩვენ, მხოლოდ დროამ 200-ზე მეტ უბანზე შევიტანეთ გადათვლის მოთხოვნა. ეს რადიკალურად შეცვლის სურათს არა უბრალოდ ციფრებში, არამედ თბილისის საკრებულოში და ეს დაგვიმტკიცებს, რომ რეალურად საკრებულო ეკუთვნის ოპოზიციას", — თქვა დროას ლიდერმა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.