სამ ოქტომბერს მორიგი ჟურნალისტური გამოძიება გამოქვეყნდა, სადაც საუბარია ოფშორულ კომპანიებსა და მათ ბენეფიციარებზე. მასშტაბურ ჟურნალისტურ გამოძიებაში ექსპრემიერი და ქართული ოცნების დამფუძნებელი ბინიძინა ივანიშვილი ისევ მოხვდა. მილიონობით დოკუმენტი 100-ზე მეტი მილიარდერის, 30 მსოფლიო ლიდერისა და 300 საჯარო მოხელის ოფშორულ გარიგებებსა და ქონებას ასახავს.

გამომძიებელ ჟურნალისტთა საერთაშორისო ასოცოიაციის (ICIJ) მიერ გამოქვეყნებულ გამოძიებაში, რომლებსაც ჟურნალისტებმა პანდორას არქივი უწოდეს, ივანიშვილის შესახებ დოკუმენტში წერია, რომ მან 1998-2016 წლებში ბრიტანეთის ვირჯინიის კუნძულებზე 12 კომპანია დააარსა, მისი კომპანიებისა და განხორციელებული ოპერაციების შესახებ ინფორმაცია კი მწირია.

ჟურნალისტთა ქსელის გამოძიება ამბობს, რომ ერთ-ერთი კომპანია Silverpot Holdings Ltd საბროკერო ანგარიშის მეშვეობით საჯაროდ აღნუსხული კომპანიების გასაკონტროლებლად შეიქმნა. მეორე Brighton Corporate კი საქართველოს თანაინვესტირების ფონდის ვალად აღებული სააქციო კაპიტალით დასაფინანსებლად შეიქმნა, რომელიც ჰიდროელექტროსადგურებში, სასტუმროებსა და სათბურებში, სხვა პროექტებთან ერთად ინვესტირებას ახდენს.

დოკუმენტში, ასევე, ნათქვამია, რომ თანაინვესტირების ფონდის წარმომადგენელმა, გიორგი ბაჩიაშვილმა ელექტრონული ფოსტით მიმოწერაში კომენტარი არ გააკეთა.

პანდორას არქივში საუბარია 300-ზე მეტ მსოფლიოს ამჟამინდელ, ყოფილ ლიდერსა და მაღალი რანგის სახელმწიფო მოხელეზე. მათ შორის არიან აზერბაიჯანის პრეზიდენტი ილჰამ ალიევი, უკრაინის პრეზიდენტი ვოლოდიმირ ზელენსკი, იორდანიის მეფე აბდულა მეორე, ჩეხეთის პრემერმინისტრი, ანდრეი ბაბიში და ბრიტანეთის ყოფილი პრემიერ-მინისტრი, ტონი ბლერი.

მასალებში ნახსენებია, აგრეთე, რუსეთის პრეზიდენტ ვლადიმირ პუტინთან დაახლოებული პირები, მათ შორის სბერბანკის თავმჯდომარე გერმან გრეფი და პირველი არხის გენერალური დირექტორი კონსტანტინ ერნსტი.

12 მილიონამდე დოკუმენტის გამოძიებაზე 117 ქვეყნის 600 ჟურნალისტი მუშაობდა.