შინაგან საქმეთა სამინისტროს თანამშრომლებმა ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვის ბრალდებით თბილისში, ფალიაშვილის ქუჩაზე ერთი პირი დააკავეს. ინფორმაციას ამის შესახებ უწყების პრესსამსახური ავრცელებს.

მათივე ინფორმაციით, ოპერატიული ინფორმაციის საფუძველზე ჩატარებული საგამოძიებო მოქმედებების შედეგად, სამართალდამცველებმა, დაკავებულის საცხოვრებელი ბინის ჩხრეკისას, გლოკ 19-ის მოდელის არარეგისტრირებული პისტოლეტი, მაყუჩი და 15 საბრძოლო ვაზნა ამოიღეს.

შსს-ში ამბობენ, რომ დაკავებული ჩადენილ დანაშაულს აღიარებს. უწყება გამოძიება ცეცხლსასროლი იარაღის მართლსაწინააღმდეგო შეძენა-შენახვის ფაქტზე სისხლის სამართლის კოდექსის 236-ე მუხლის მე-2 ნაწილით მიმდინარეობს. ამ მუხლით, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა ან შენახვა, ჩადენილი არაერთგზის ისჯება თავისუფლების აღკვეთით ვადით ოთხ წლამდე.