ქართული ოცნების საზოგადოებასთან ურთიერთობის სამსახურის მდივანი შალვა პაპუაშვილი საარჩევნო უბნებზე დაფიქსირებული დარღვევების ცნობებზე ამბობს, რომ სიმართლეს არ შეესაბამება და მათ მიერ დაფიქსირებული დარღვევები და ინციდენტები წარმოადგინა. პაპუაშვილმა ნაციონალური მოძრაობის ერთ-ერთ ლიდერ ხატია დეკანოიძის ბრალდებას ბრიფინგზე უპასუხა.

"ხატია დეკანოიძეს ჰქონდა პრესკონფერენცია ინფრასტრუქტურის მინისტრის მოადგილესთან დაკავშირებით. საინტერესოა, რომ მან არცერთი ფაქტი არ დააფიქსირა, ერთადერთი ფაქტი რაც იყო ინფრასტრუქტურის მინისტრის მოადგილე იმყოფა ქუთაისში და მან ამას უწოდა ადმნისტრაციული რესურსის გამოყენება. ყველას შევახსენებ, რომ მინისტრის მოადგილე პოლიტიკური თანამდებობის პირია და რა თქმა უნდა, მას აქვს სრული შესაძლებლობა ჩაერთოს პარტიულ საქმიანობაში და რა თქმა უნდა, ეს არის მათი სამუშაოს ერთ-ერთი ნაწილი", — განაცხადა პაპუაშვილმა.

მისივე მტკიცებით, თბილისში, ჩუღურეთის რაიონზე ევროპული საქართველოს კანდიდატის მხრიდან, ასევე, ყალბი ინფორმაცია გავრცელდა იმის შესახებ, რომ 24-ე უბანზე სუს-ის თანამშრომლები იმყოფებოდნენ. პაპუაშვილი ირწმუნება, რომ ეს საკითხიც გადაამოწმეს. ქართული ოცნების საზოგადოებასთან ურთიერთობის სამსახურის მდივანი ამბობს, რომ საქმე ეხება სუს-ის საზოგადოებრივი მართვის სამსახურის თანამშრომელს, რომელმაც იმ უბანზე ცოლი მიიყვანა. პაპუაშვილის თქმით, მას მანქანაში ბავშვიც ჰყავდა, ვინაიდან ცოლი ცამავე უბანზე ცხოვრობს.

"შემდეგი შეეხება ლელოს კანდიდატ თამარ ყორღანაშვილს, რომელიც ავრცელებს ვიდეოს, რომელიც შემდეგ TV პირველზეც გავრცელდა, თითქოს საგარეჯოს მე-8 უბანზე ადგილი ჰქონდა ამომრჩევლის მოსყიდვას. სინამდვილეში, იქ დაფიქსირებული ადამიანები მეუღლეები არიან და ქმარი ცოლს პროდუქტების საყიდლად თანხას აძლევდა.

დაბოლოს დმანისთან დაკავშირებით, TV პირველის ერთ-ერთი ჟურნალისტი ამბობს, რომ სუს-ის მობილიზება ხდება დმანისში, რაც სიმართლეს არ შეესაბამება", — აცხადებს პაპუაშვილი.

მან, აგრეთვე, თქვა, რომ უბნებთან სულ 9 ინციდენტი დააფიქსირეს, რაც ამოწურულია. მისივე თქმით, არცერთი ინციდენტი არ იყო, სადაც იყო ძალადობა.

"ყველა ინციდენტი მიმდინარეობდა სიტყვიერი შელაპარაკების დონეზე. ამასთან ჩვენ ვხედავთ, რომ ხდება მობილიზება ნაციონალური მოძრაობის მხარდამჭერებისა სხვადასხვა ლოკაციაზე, სადაც ხედავენ ისინი რომ აგებენ არჩევნებს. რუსთავში ჩასულები არიან მერაბიშვილი, შაშკინი, ხაბეიშვილი, ჭანკვეტაძე და როგორც ჩანს იქ არის რისკი, რომ გარკვეულ პროვოკაციებს ჰქონდეს ადგილი. ასევე, დმანისში, როგორც მივიღეთ ინფორმაცია ოქრიაშვილი მიემგზავრება ტელევიზიებთან ერთად და აქაც არის რისკი რომ იყოს პროვოკაცია", — ამბობს პაპუაშვილი.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.