ქართული ოცნების დეპუტატისა და ადამიანის უფლებათა კომიტეტის თავმჯდომარის, მიხეილ სარჯველაძის მტკიცებით, დმანისში მომხდარი დაპირისპირების შემთხვევაში ადგილი ჰქონდა არა თავდასხმას, არამედ ძალადობის პროვოცირებას. თუმცა, მისი აზრით, აუცილებელია კონკრეტული სამართლებრივი რეაგირება.

"სიტყვა თავდასხმა, საერთოდ, მე ვფიქრობ, არასწორად არის გამოყენებული, იმიტომ, რომ იქ საუბარი იყო მაგალითად, პროვოცირებაზე, სამართალდარღვევის, ძალადობის პროვოცირებაზე და ა.შ. თავდასხმა არის ცოტა სხვა ვითარება და სხვაგვარი შემთხვევა", — აცხადებს სარჯველაზე.

დაპირისპირება დმანისში გუშინ, 21 სექტემბერს წინასაარჩევნო შეხვედრის დროს მოხდა. ქართული ოცნების მხარდამჭერები ოპოზიციის წარმომადგენლებს ჯერ სიტყვიერად, შემდეგ კი ფიზიკურად დაუპირისპირდნენ, დაჭრილია 2 ადამიანი.

დღეს, 22 სექტემბერს დაჭრის ბრალდებით ქართული ოცნების კანდიდატის შვილი, დავით დაუთაშვილი დააკავეს. შსს-ს განცხადებით, დაკავებულმა 21 სექტემბერს დანით სახის არეში დაზიანებები მიაყენა ენმ-ს მხარდამჭერებს.

პარტია პროგრესი და თავისუფლების ლიდერმა მიხეილ დაუთაშვილის შვილი მომხდარში გუშინვე დაადანაშაულა, თუმცა მაშინ "ოცნების" კანდიდატმა მისი შვილის ადგილზე ყოფნა უარყო. თუმცა შვილის დაკავების შემდეგ ის ამტკიცებს, რომ დაპირისპირება კახა ოქრიაშვილის მხარდამჭერებმა გამოიწვიეს და "პროვოკაციაზე წამოაგეს". დაუთაშვილის თქმით, შვილმა დაინახა, რომ მამას ურტყამდნენ და აფექტის მდგომარებაში მოიქცა ასე. მისივე თქმით, ის პოლიციას თავად ჩაბარდა, შსს-ს განცხადებაში კი ვკითხულობთ, რომ ის მომხდარიდან რამდენიმე საათში, დმანისის მუნიციპალიტეტში დააკავეს.

ენმ-მ მომხდარზე პასუხისმგებლობა ქართულ ოცნებას დააკისრა. თუმცა ქართული ოცნების თავმჯდომარე, ირაკლი კობახიძემ განაცხადა: "კაცმა დაჭრა, დეგენერატმა ვიღაც კაცი, რა პასუხისმგებლობა უნდა ავიღო".

საქმეზე გამოძიება ჯანმრთელობის განზრახ მძიმე დაზიანების და ჯგუფურად ჩადენილ ძალადობის მუხლებით საქართველოს სისხლის სამართლის კოდექსის 117-ე მუხლით და 126-ე მუხლის პირველი პრიმა ნაწილის "ბ" ქვეპუნქტით მიმდინარეობს. დანაშაული 3-დან 6 წლამდე ვადით თავისუფლების აღკვეთას ითვალისწინებს.

ამავე თემაზე: