ქართული ოცნების წევრის, ირაკლი ზარქუას თქმით, მას გაუხარდებოდა, რომ უსმენდნენ. ზარქუამ ეს იმით ახსნა, მობილურით ისეთ თემებზე საუბრობს, რომელიც, მისივე შეფასებით, პირადი ცხოვრების ამსახველი არ არის.

"მე პირიქით, გამიხარდებოდა, რომ მისმენდნენ, იმიტომ რომ სულ მაქვს ხოლმე და ვჩხუბობ ხოლმე ტელეფონში, რომ აი, იქნებ, სკურის გზა დროულად გაკეთდეს, იქნებ, მეტი ყურადღება მივაქციოთ, ვთქვათ, ადგილობრივ იმას... არ მაქვს ის განცდა, რომ რაღაც პირადი ცხოვრების ამსახველია სადღაც, არა მაქვს ეს განცდა და არა მაქვს ეს შიშები", — განაცხადა ზარქუამ.

დეპუტატი ამტკიცებს იმასაც, რომ მოსმენები ყველა ნორმალურ სახელმწიფოშა.

"ზოგადად მოსმენები, სახელმწიფო თუ არსებობს ნორმალური, ყველგან ხდება სანქცირებულად, მათ შორის გარკვეული ჯგუფების მიმართ და ეს არაფერია ამაში ახალი", — ამბობს ის.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს. ჩანაწერების მიხედვით, უსმენენ და უთვალთვალებენ სასულიერო პირებს, ელჩებსა და საელჩოების თანამშრომლებს, არასამთავრობო ორგანიზაციების წევრებს, აქტივისტებს, პოლიტიკოსებს, ჟურნალისტებს, ძალადობრივი ჯგუფის წევრებსა და ლიდერებს და ამ ადამიანებთან კავშირში მყოფ მოქალაქეებს. ამასთან, ჩამონათვალში შეხვდებით კონკრეტული სასულიერო პირების მძღოლებს, საპატრიარქოს დაცვას, სტიქაროსნებს, თეოლოგებსა და სამების დამლაგებელსაც კი. ფაილებს შორის არის ინფორმაცია საპატრიარქოში რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც ავთენტურობას არც უარყოფს და არც ადასტურებს. უწყება აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. 14 სექტემბერს საქმეზე გამოძიება პროკურატურამ კერძო კომუნიკაციის საიდუმლოების დარღვევის მუხლით დაიწყ, 18 სექტემბერს კი დამატებით განცხადება გაავრცელა, სადაც მიუთითა, რომ გამოძიება ფარული მასალების შემდგენსა და მომპოვებლებსაც ეძებს. მათივე განცხადებით, სამართლებრივი დახმარების ფარგლებში, აშშ-სა და სხვა ქვეყნებს გამოძიებით დადგენილ სერვერებზე მონაცემების შენახვისა და გამოთხოვის მიზნით მიმართეს.

გაიგეთ მეტი: