საქსტატმა ადგილობრივი ტურიზმის სტატისტიკა გამოაქვეყნა, რომლის მიხედვითაც მიმდინარე წლის მეორე კვარტალში საქართველოში 3,69 მილიონმა ვიზიტორმა 4,2 მილიონი ვიზიტი განახორციელა. როგორც საქსტატის ანგარიშშია ნათქვამი, აღნიშნულ პერიოდში ვიზიტორების რაოდენობა 2-ჯერ აღემატებოდა 2020 წლის მეორე კვარტალის შესაბამის მონაცემს.

ადგილობრივ ვიზიტორში 15 წლის ან უფროსი ასაკის ისეთი მოგზაური იგულისხმება, რომელიც საქართველოში ცხოვრობს და კონკრეტული პერიოდის განმავლობაში საკუთარი საცხოვრებელი ადგილიდან ქვეყნის სხვა მუნიციპალიტეტში გადაადგილდება.

ადგილობრივი ტურიზმის ზრდის მთავარი მიზეზი გასული წლის მეორე კვარტალთან შედარებით გაზრდილი მობილობაა. როგორც ცნობილია, 2020 წლის მეორე კვარტალში საქართველოში მკაცრი ლოქდაუნი მოქმედებდა.

ოფიციალური სტატისტიკის მიხედვით, მთლიანი ვიზიტებიდან 1,96 მილიონი ტურისტული ტიპის ვიზიტი იყო. აქ ისეთი ტიპის ვიზიტების იგულისხმება, როდესაც ვიზიტორმა მოგზაურობისას ერთი ღამე მაინც გაათენა. ეს მონაცემი გასული წლის იმავე პერიოდის მაჩვენებელს 112,3%-ით აღემატება.

აღსანიშნავია, რომ ვიზიტების თითქმის ნახევარი, 47% მეგობრებისა და ნათესავების მონახულების მიზნით განხორციელდა. გარდა ამისა, მოგზაურობის მიზანი 17,5%-თვის მეორე სახლის მონახულება, ხოლო 14,1%-თვის შოპინგი იყო.

მიმდინარე წლის აპრილ-ივნისში ადგილობრივი ვიზიტორების მიერ ყველაზე მეტი ვიზიტი თბილისში, იმერეთსა და კახეთში განხორცილედა. ამ რეგიონებში ვიზიტების ნახევარზე მეტი, 50.4% მოდის.

რეგიონების ჩამონათვალი, სადაც მიმდინარე წლის მეორე კვარტალში ადგილობრივმა ვიზიტორებმა იმოგზაურეს:

• თბილისი — 949 ათასი ვიზიტი;
• იმერეთი — 762 ათასი ვიზიტი;
• კახეთი — 434 ათასი ვიზიტი;
• მცხეთა-მთიანეთი — 424 ათასი ვიზიტი;
• აჭარის ა/რ — 409 ათასი ვიზიტი;
• შიდა ქართლი — 368 ათასი ვიზიტი;
• ქვემო ქართლი — 348 ათასი ვიზიტი;
• სამეგრელო-ზემო სვანეთი — 273 ათასი ვიზიტი;
• სამცხე-ჯავახეთი — 117 ათასი ვიზიტი;
• სხვა რეგიონები — 172 ათასი ვიზიტი.
  

როგორც კვლევა აჩვენებს, 2021 წლის მეორე კვარტალში ადგილობრივმა ვიზიტორებმა 610,2 მილიონი ლარი დახარჯეს, რაც გასული წლის იმავე პერიოდის მონაცემზე 128%-ით მეტია. ამასთან, ვიზიტზე გაწეული საშუალო ხარჯი გაზრდილია 8,9%-ით და 143,7 ლარს უტოლდება.

ვიზიტორების მიერ დახარჯული თანხები კატეგორიების მიხედვით ასე ნაწილდება:

• საყიდლები — 234 მილიონი ლარი;
• საკვები და სასმელი — 138 მილიონი ლარი;
• ტრანსპორტი — 129 მილიონი ლარი;
• განთავსება — 11 მილიონი ლარი;
• გასართობი, გამაჯანსაღებელი, კულტურული და სპორტული ღონისძიებები — 1 მილიონი ლარი;
• სხვა — 97 მილიონი ლარი.

გამოკვლევის შედეგების მიხედვით, ვიზიტორების 44,1% თბილისის მაცხოვრებელია, 11,6% მოდის იმერეთის, რაჭა-ლეჩხუმისა და ქვემო სვანეთის რეგიონზე, 11,2% — ქვემო ქართლის რეგიონზე, ხოლო დანარჩენი რეგიონებზე ჯამში 33,1% მოდის.