პარტია დროას დამფუძნებლის, ნინო გოგუაძის განცხადებით, თვითმმართველობის არჩევნებზე ბელარუსის ცენტრალური საარჩევნო კომისიის ხილვა აღმაშფოთებელია. მისივე თქმით, ბელარუსის სახელმწიფო უსაფრთხოების სამსახურთან გაფორმებული ხელშეკრულება ცხადყოფს, "საით მიაქანებს ქვეყანას" ქართული ოცნება. ის მიუთითებს იმაზე, რომ ბელარუსში მასობრივი გამოსვლები სწორედ ცესკოს მიერ მიერ გამოცხადებულ შედეგებს მოჰყვა.

"ლუკაშენკოს ბრძანებით, ხალხი არაერთხელ სასტიკად დაარბიეს, დააპატიმრეს ხოლო ათასობით ადამიანი აწამეს. პროტესტს მოჰყვა მსხვერპლიც. სწორედ ბელარუსის ცესკოს მიერ ოფიციალურად გამოქვეყნებულ მონაცემებს ეფუძნებოდა ზემოხსენებული წარმოუდგენელი უსამართლობა. სწორედ ასეთი სახელმწიფოს ასეთი ორგანიზაცია მოიწვია საქართველოს ხელისუფლებამ თავისუფალი არჩევნების დამკვირვებლად.

თუ გავითვალისწინებთ საქართველოს ხელისუფლების წარმომადგენლების სრულიად აგდებულ დამოკიდებულებას დასავლური დემოკრატიული ინსტიტუტებისა და მათი რჩევების მიმართ და გავიხსენებთ ბელარუსის სახელმწიფო უსაფრთხოების სამსახურთან სულ ცოტა ხნის წინ გაფორმებულ ხელშეკრულებას, სრულიად ცხადი ხდება ქართული ოცნების ხელისუფლების გეზი, ტრაექტორია და ის გზა, საითაც მიაქანებს ქვეყანას", — განაცხადა გოგუაძემ ბრიფინგზე.

ამასთან, იგი ქართულ ოცნებას პუტინისა და ლუკაშენკოს რეჟიმთან შეხმატკბილებულად მოიხსენიებს.

საქართველოში 2 ოქტომბრის ადგილობრივი თვითმმართველობის არჩევნებს ბელარუსის ცესკოც დააკვირდება. ბელარუსის გარდა ცესკოს მიერ 24 საერთაშორისო დამკვირვებელი ორგანიზაციაა რეგისტრირებული.

2020 წლის აგვისტოში ბელარუსში გამართული არჩევნების შედეგებს აშშ და ევროპის ქვეყნები არ აღიარებენ. ისინი ბელარუსის ხელისუფლებას ახალი არჩევნების ჩატარებისკენ მოუწოდებენ.

მასობრივი საპროტესტო გამოსვლები ბელარუსში საპრეზიდენტო არჩევნების შედეგების გამოცხადების დღიდან, 9 აგვისტოს დაიწყო. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი, ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%. მოსახლეობის უმრავლესობამ არჩევნების ეს შედეგები არ ცნო და სამართლიანი არჩევნების მოთხოვნით, ქუჩებში უპრეცედენტო რაოდენობის ხალხი გამოვიდა.

საპროტესტო აქციებს ლუკაშენკომ მაშინვე რეპრესიები დაუპირისპირა. დემონსტრანტების დაკავებები პროტესტის პირველივე დღიდან დაიწყეს, ოპოზიციის წევრებს კი დაკითხვებზე იბარებდნენ.