გარემოს დაცვისა და სოფლის მეურნეობის მინისტრმა, ლევან დავითაშვილმა კითხვას,არია თუ არა ბოლო პერიოდში პრემიერმინისტრის რიტორიკა აგრესიული, უპასუხა, რომ "უშინაარსო" და "არაკომპეტენტურ" გამოხტომებზე ღარიბაშვილს ადეკვატური პასუხები აქვს.

"სამწუხაროდ, შეგვიძლია ვთქვათ, რომ პოლიტიკური ველი არის დაცლილი საქმიანი, აზრიანი კრიტიკისგან, რაც მთავრობას ასე სჭირდება, ნებისმიერ მთავრობას, არ აქვს მნიშვნელობა ეს იქნება ქართული ოცნების მთავრობა, თუ არა, ზოგადად, მთავრობას იმისთვის, რომ ქვეყანა უკეთესად ვითარდებოდეს და დემოკრატიული პროცესები მიდიოდეს ქვეყანაში. ჩვენ ამის სანაცვლოდ ვიღებთ, უშინაარსო და არაკომპეტენტურ გამოხტომებს და პრემიერის მხრიდან არის ამაზე ადეკვატური პასუხი", — ამბობს მინისტრი.

მისივე აზრით, ღარიბაშვილის შეფასებები შეესაბამება არსებულ რეალობას და არის ძალიან კონკრეტული ოპონენტების დასმულ საკითხებზე.

"მე ვფიქრობ, რომ პრემიერის შეფასებები არის შესაბამისი იმ რეალობის, რაც ჩვენ გვაქვს, ანუ ყოველ შემთხვევაში პრემიერის კომენტარები არის ძალიან კონკრეტული ოპონენტების მიერ დასმულ საკითხებზე. ჩვენ საარჩევნო კამპანიაში ერთად ვიღებთ მონაწილეობას, შესაბამისად ერთად გვაქვს შეხვედრები რეგიონებში და მე რასაც ვუყურებ, ეს არის აბსოლუტურად ადეკვატური შეფასება ნებისმიერ საკითხში, რაზეც ვეთანხმები ბოლომდე პრემიერს. ეს ეხება, როგორც წარსულ, ხშირ შემთხვევაში, სამწუხაროდ, დანაშაულებრივ ქმედებებს, გამოვლინებებს ოპონენტების, ისე დღევანდელ ქმედებებს, ხშირ შემთხვევაში უსაფუძვლო კრიტიკას, ხშირ შემთხვევაში არაკომპეტენტურ კრიტიკას", — განაცხადა დავითაშვილმა.