ფოთისა და ხობის ეპარქიის განცხადებით, ყოვლად გაუმართლებელი და დაუშვებელია სასულიერო პირთაგან აცრის საწინააღმდებო მოწოდებები. განცხადებაში აღნიშნულია, რომ ქრისტიანები რწმენისკენ არიან მოწოდებულნი, მაგრამ ეს "სულაც არ ნიშნავს გონების უარყოფას".

ეპარქიის გავრცელებული ინფორმაციით, სამღვდელობის კრებაზე ვაქცინაციასთან დკავშირებულ მითებსა და სპეკულაციურ ინფორმაციებზე იმსჯელეს, რომელიც ხალხში იწვევს უსაგნო შიშებსა და უნდობლობას მედიცინის თანამედროვე შესაძლებლობათა მიმართ და რიგ შემთხვევაში რელიგიურ კონტექსტში სახიფათო მოლოდინებს აღძრავს.

"მსჯელობისას გამოითქვა აზრი, რომ მედიცინის მუშაკთა და ზოგადად, მედიცინის თანამედროვე მიღწევებისადმი უნდობლობის გამოცხადება ცოდნისა და რწმენის დაპირისპირების ნიშნებს ატარებს; კაცობრიობის სულიერ-ინტელექტუალური მემკვიდრეობა კი სწორედ ამ ორი ფენომენის — რწმენისა და ცოდნის დაახლოებასა და ურთიერთაღიარებაზეა ამოზრდილი.

შესაბამისად, ყოვლად გაუმართლებელი და დაუშვებელია სასულიერო პირთაგან აცრის საწინააღმდეგო მოწოდებებით გამოსვლა: ჩვენ, ქრისტიანები, გამოცხადების მეშვეობით რწმენისკენ ვართ მოწოდებულნი, მაგრამ ეს მოწოდება სულაც არ ნიშნავს გონების უარყოფას", — წერია განცახდებაში.

მათივე თქმით, შეხვედრაზე აღინიშნა, რომ არსებობს ფუნდამენტური მნიშვნელობის ისეთი საკითხები, რაშიც სასიცოცხლოდ აუცილებელია საზოგადოების დიდ ნაწილში არსებობდეს საერთო თანხმობა, რადგან უამისოდ საზოგადოება ადვილად აღმოჩნდება მოწყვლადი სხვადასხვა გამოწვევის წინაშე.

ეპარქიაში ამბობენ, რომ ტაძრების წინამძღვრებს დაევალათ ეპარქიის ეკლესია-მონასტრებში ზედმიწევნით დაიცვან სახელმწიფოს მიერ დაწესებული რეგულაციები და რეკომენდაციები (პირბადის ტარება, ღმრთისმსახურებაზე დამსწრეთა შორის აუცილებელი დისტანციის დაცვა, სადეზინფექციო საშუალებები და სხვა).

მთელი პანდემიის პერიოდში საპატრიარქო რეკომენდაციების უგულებელყოფით გამოირჩეოდა. განსხვავებით მსოფლიო ეკლესიებისგან, საპატრიარქომ 2020 წლის გაზაფხულზე არ შეაჩერა ეკლესიებში მრევლის მიღება, ასევე, ერთი კოვზით ზიარება. ამ პერიოდში ტაძრების მხოლოდ ნაწილში დაცული იყო სოციალური დისტანცია, სხვა რეკომენდაციებს მართლმადიდებელი ეკლესიის წარმომადგენლები, მეტწილად, არ იცავდნენ. მეტიც, პანდემიის პიკში კონკრეტული სასულიერო პირები ანტივაქსერული განცხადებებით გამოირჩევიან და უარგუმენტო კონსპირაციის თეოერიებს ავრცელებენ. მათ შორის, არიან მღვდელმთავრები.