ქართული ოცნების თავმჯდომარე, ირაკლი კობახიძე ტყუილს უწოდებს გავრცელებულ ინფორმაციას, მასსა და პრემიერმინისტრ ირაკლი ღარიბაშვილს შორის შესაძლო დაპირისპირებაზე. მან სამ ტელევიზიას — ფორმულად, TV პირველსა და მთავარს "სიცრუის პროპაგანდის წყარო" უწოდა და ამტკიცებს, რომ ეს "ტყუილი" მათი გავრცელებულია.

"ეს არ არის მოსაზრება, ეს არის ტყუილი. ცარიელი ტყუილია. ეს ტელევიზია ფორმულამ დაიწყო, გააგრძელა TV პირველმა, გაავრცელა მთავარმა. ანუ, სამი ტელევიზიაა და სამივე ტყუილს ავრცელებს და თქვენც [პალიტრანიუსი] აგრძელებთ ახლა ამ თემას დ აარის ცარიელი ტყუილი და ცარიელი სპეკულაცია. ეს არის ისეთი ტელევიზიების მიერ მოგონილი ტყუილი — ფორმულა, TV პირველი, მთავარი არხი — სამივე სიცრუის პროპაგანდის წყარო", — განაცხადა ირაკლი კობახიძემ.

აღსანიშნავია, რომ თავდაპირველად, ამ თემაზე დასმული კითხვის საპასუხოდ კობახიძემ ნაციონალური მოძრაობის ლიდერებს შორის შესაძლო დაპირისპირებაზე ისაუბრა.

"ამ დროს არის კატასტროფული პრობლემები ჩვენს ოპონენტ პარტიებში. ყველამ იცის, აბსოლუტურად ყველამ როგორი ურთიერთდამოკიდებულებაა, მაგალითად, სააკაშვილსა და მელიას შორის, მერაბიშვილსა და მელიას შორის და ა.შ. იქ არის დაჯგუფებები, [რომლებიც] ერთმანეთს ვერ იტანენ. საჯაროდაც ჩანს, ჩვენც ვხედავთ ხოლმე, პარლამენტის სხდომათა დარბაზში, მაგალითად, როდესაც ვიღაცები აწყობენ დესტრუქციას, ვიღაცები ამაში არ მონაწილეობენ ნაციონალური მოძრაობიდან და იქ ძალიან მარტივად იკვეთება ხაზები, რომელიც არიან ერთმანეთთან დაპირისპირებულები. ამას აქვს რეალური საფუძველი. ერთმანეთს ჭამენ ოპოზიციაში. ამიტომ არიან აბსოლუტურად არეული", — განაცხადა ირაკლი კობახიძემ პალიტრანიუსის ეთერში.

ბოლო რამდენიმე კვირის განმავლობაში ირაკლი კობახიძე მედიასთან ფაქტობრივად არ გამოჩენილა. ამის პარალელურად, ირაკლი ღარიბაშვილი სხვადასხვა მუნიციპალიტეტში ქართული ოცნების მერობის კანდიდატებს წარადგენს და აქტიურად აკეთებს საჯარო განცხადებებს სხვადასხვა საკითხზე. სწორედ ეს გახდა ერთ-ერთი მიზეზი მათ შორის შესაძლო დაპირისპირებაზე დისკუსიის დაწყებისა.

აღსანიშნავია, რომ ეს არ არის პირველი შემთხვევა, როცა ქართული ოცნების ლიდერები მედიას თავს ესხმიან. 5-6 ივლისის ძალადობრივი მოვლენების შემდეგ დაწყებულ პროტესტს, რომლის დროსაც მედიის 53 ჟურნალისტი დაშავდა, მმართველი პარტიის ლიდერებმა ბოიკოტით უპასუხეს და კრიტიკული მედიის კითხვებს აღარ პასუხობდნენ.