30 აგვისტოს ქაბულის აეროპორტში სარაკეტო თავდასხმა განხორციელდა. ინფორმაციას ამის შესახებ Reuters ავრცელებს და აცხადებს, რომ აშშ-ს ანტისარაკეტო თავდაცვის სისტემამ 5 რაკეტის განეიტრალება მოახერხა.

მედიის განცხადებით, რაკეტები ამერიკელი სამხედროების მიმართულებით იყო ნასროლი, თუმცა არსებული ინფორმაციით, თავდასხმას მსხვერპლი არ მოჰყოლია. თეთრი სახლის განცხადებით, ევაკუაციის პროცესი შეუფერხებლად გრძელდება.

Reuters-ის ცნობით, ევაკუაციის პროცესის დაწყებიდან დღემდე აშშ-ს ძალებმა 114 400-მდე ადამიანი გამოიყვანეს, მათ შორის, უცხო ქვეყნისა და რისკის ქვეშ მყოფი ავღანეთის მოქალაქეები. ევაკუაციის პროცესის ბოლო ვადა 31 აგვისტოა.

26 აგვისტოს ქაბულში 2 აფეთქება მოხდა — თვითმკვლელმა ტერორისტმა აეროპორტის შესასვლელთან, სადაც ავღანელი ლტოლვილები იყვნენ შეკრებილნი, თავი აიფეთქა, მეორე აფეთქება ერთ-ერთ სასტუმროსთან იყო. 27 აგვისტოს, აშშ-ის პრეზიდენტმა ჯო ბაიდენმა განაცხადა, რომ ტერორისტებს პასუხს აგებინებდნენ ამის გამო.

ტერაქტის შედეგად გარდაცვლილთა რაოდენობამ 170-ს გადააჭარბა, 200-ზე მეტი კი დაშავებულია. 27 აგვისტოს პენტაგონმა დაადასტურა, რომ აფეთქების შედეგად აშშ-ის 13 სამხედრო მოსამსახურე გარდაიცვალა, 18 კი დაიჭრა. ტერაქტზე პასუხისმგებლობა ISIS-ის ავღანურმა დანაყოფმა აიღო.


თალიბანის მიერ დასავლეთის მიმართ გაჟერებულმა მუქარამ, რომ 31 აგვისტოს შემდეგ ავღანეთში მათი დარჩენა ე.წ. წითელი ხაზი იქნებოდა და მოქმედებას დაიწყებდნენ, ევაკუაციაზე ზეწოლა გააძლიერა — დასავლეთი ცდილობს, ქვეყნიდან გაიყვანოს ათიათასობით უცხოელი და ავღანელი, რომლებიც თალიბანის წინააღმდეგ 20-წლიანი ომის დროს ეხმარებოდნენ. ტერაქტამდე ორი დღის განმავლობაში კი დაზვერვის მონაცემებზე დაყრდნობით ვრცელდობოდა ინფორმაცია, რომ ქაბულის აეროპორტზე თავდასხმას ISIS გეგმავდა, რის გამოც მოქალაქეებს აეროპორტში არმისვლისკენ მოუწოდებდნენ.