პანდემიის გამო დაცარიელებული ქალაქის ქუჩებსა თუ სოფლებში რომ დანავარდობენ სხვადასხვა სახეობის ცხოველები, სიახლე არავისთვისაა, მაგრამ უკვე ისეთი პირი უჩანს, რომ ცხოველები ადამიანების გამოჩენის შემდეგაც აღარ აპირებენ ადგილის დათმობას.

დიახ, ხუმრობა არ გეგონოთ: კუნძულ კორსიკაზე ადგილობრივმა ძროხებმა სანაპიროს ტერიტორიის დაიკავეს და ტურისტებს დიდ კონკურენციას უწევენ.

როგორც The Cut წერს, საფრანგეთის ამ ცნობილ კუნძულზე ძროხები აქამდეც ჩნდებოდნენ ხოლმე სანაპიროებზე, მაგრამ ამჯერად ისე გათამამდნენ, რომ ზღვის პირას დასვენების მსურველი ადამიანების გამოჩენა აღარ ეპიტნავებათ.

Forbes-ის ინფორმაციით, კუნძულზე დაახლოებით 15 000 ძროხაა, რომელთაგან ნახევარი ფერმერებს ეკუთვნით, ნახევარი კი გარეულია — ისინი მთელ კუნძულზე დახეტიალობენ.

New York Post-ის ცნობით, პანდემიის გამო გამოცხადებული მკაცრი შეზღუდვებისას, როცა ადამიანები გარეთ იშვიათად გამოდიოდნენ, ცხოველები კიდევ უფრო გათამამდნენ, ამიტომ ახლა ადამიანების მიმართ მეტად აგრესიულებიც გახდნენ.

შესაძლოა, შორიდან ეს ყველაფერი კომიკური მოგეჩვენოთ, მაგრამ უკვე არაერთი შემთხვევა დაფიქსირდა, როცა ძროხის მიერ მიყენებული ტრავმის გამო რამდენიმე ადამიანის კლინიკაში გადაყვანაც კი გახდა საჭირო.