ჯანდაცვის მინისტრის მოადგილის, თამარ გაბუნიას განცხადებით, სოციალურ ქსელში კოვიდინფიცირებულებისთვის ჟანგბადის აპარატის ძებნა მიუღებელი პრაქტიკაა. მისი აზრით, ამ პოსტის ავტორებს არათუ ჟანგბადის აპარატი სჭირდებათ, არამედ მიზნად ისახავენ დესტრუქციას, რადგან პაციენტი, რომელსაც ეს საჭიროება აქვს, კლინიკაში ან კოვიდსასტუმროში უნდა იყოს.

"ჟანგბადი ვისაც სჭირდება, ის პაციენტი იმყოფება კლინიკაში, იმყოფება კოვიდსასტუმროში, სადაც ჩვენ გვაქვს ჟანგბადის კონცენტრატორი. 1 500-მდე ჟანგბადის კონცენტრატორი შეიძინა ჯანდაცვის სამინისტრომ და არის საკმარისი რაოდენობა კონცენტრატორების, რომ ყველა პაციენტს, რომელსაც სჭირდება, ჟანგბადი მიიღოს. ბინაზე მყოფი პაციენტებისთვის ჟანგბადის ძიება, რა თქმა უნდა, ამ პაციენტების მდგომარეობის მართვას არ ნიშნავს და არც გაუმჯობესებას. მე ვფიქრობ, რომ ასეთი ტიპის პოსტები უბრალოდ ემსახურება დესტრუქციას და იმას, რომ მოსახლეობაში გამოიწვიოს პანიკა", — განაცხადა გაბუნიამ.

გუშინ, 24 აგვისტოს, დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ ჟანგბადის მოთხოვნა ქვეყანაში იზრდება და ყველა საავადმყოფო მაღალი დაძაბულობის პიკზე მუშაობს, თუმცა ჯერჯერობით, ჟანგბადის ნაკლებობა არ არის, რადგან რამდენიმე საავადმყოფოს ჟანგბადის წარმოების ქარხანა აქვს, ასევე, რამდენიმე დიდი საწარმოა ქვეყანაში და ხდება ჟანგბადის იმპორტიც. ამიტომ გამყრელიძის განცხადებით, დღეს ყველას ვისაც ჟანგბადი სჭირედბა, მიეწოდება.

თუმცა, სოციალურ ქსელში გამოქვყენდა რამდენიმე პოსტი, სადაც მოქალაქეები ჟანგბადის აპრატით დახმარებას ითხოვენ. არსებული ინფორმაციით, კონკრეტული პირები აპარატებს დღიურად აქირავებენ.