სოციალური სამართლიანობის ცენტრის შეფასებით, თბილსერვის ჯგუფის თანამშრომლის, ირაკლი ბაღდავაძის სამსახურიდან გათავისუფლება განსხვავებული აზრის საფუძველზე დისკრიმინაციის ნიშნებს შეიცავს. ორგანიზაცია თბილსერვის ჯგუფს მოუწოდებს, დაუყოვნებლივ, წერილობით განუმარტოს ბაღდავაძეს გათავისუფლების მიზეზები. გარდა ამისა, ორგანიზაცია მოუწოდებს შრომის ინსპექციას დაამონიტორინგოს დასუფთავების სამსახურის თანამშრომლების სამუშაო გარემო.

"ირაკლი ბაღდავაძის თქმით, განთავისუფლების შემდეგ მას პერსონალური ინფორმაციის გამოქვეყნებით ემუქრებიან, ხოლო მედიაში დამატებით ვრცელდება ინფორმაცია ირაკლის პირადი ცხოვრების ამსახველი კადრების გავრცელებით განხორციელებულ შანტაჟზე. სოციალური სამართლიანობის ცენტრი მიიჩნევს, რომ აღნიშნული დამატებითი შესწავლისა და გამოძიების საგანი უნდა გახდეს", — აცხადებენ სოციალური სამართლიანობის ცენტრში.

ორგანიზაციის ინფორმაციით, ბაღდავაძე მათ სამართლებრივი დახმარების თხოვნით თავდაპირველი პროტესტის შემდეგ დაუკავშირდა და გათავისუფლების რისკებზე მაშინვე საუბრობდა.

სოციალური სამართლიანობის ცენტრის ინფორმაციით, გათავისუფლებამდე ორი დღით ადრე თბილსერვის ჯგუფის მონიტორინგის სამსახურმა ბაღდავაძის საკითხზე მოკვლევა ჩაატარა. მათი თქმით, ბაღდავაძისთვის ამ დრომდე უცნობია მოკვლევის შედეგები.

"სხდომის მიმდინარეობისას ირაკლი ბაღდავაძე უარყოფდა კონფლიქტს სხვა დასაქმებულებთან და თბილსერვის ჯგუფს ამ დაპირისპირების ინსცენირებაში ადანაშაულებდა.

სხდომის მიმდინარეობისას თბილსერვის ჯგუფის წარმომადგენელი ირაკლი ბაღდავაძის მიმართ აგრესიულად იყო განწყობილი და ირაკლი ბაღდავაძის შეფასებით არასამთავრობო ორგანიზაციის წარმომადგენლობის გარეშე სხდომა აუცილებლად შანტაჟის, შევიწროვებისა და მუქარის ფონზე წარიმართებოდა", — აცხადებენ სოციალური სამართლიანობის ცენტრში.

დასუფთავების სამსახურის თანამშრომლებმა 6 აგვისტოს რთულ სამუშაო პირობების გასაპროტესტებლად და ხელფასის მომატების მოთხოვნით აქცია გამართეს. თბილსერვისის ჯგუფში აცხადებდნენ, რომ თანამშრომელთა მოთხოვნები "გონივრულ ვადაში" დაკმაყოფილდებოდა. 13 აგვისტოს ირაკლი ბაღდავაძემ განაცხადა, რომ მას ხელმძღვანელობამ, რომეო მიქაუტაძემ თბილისის მერი, კახა კალაძისთვის ბოდიშის მოხდა მოსთხოვა და ამის სანაცვლოდ ფული შესთავაზა. მიქაუტაძე აღნიშნულს აბსურდულს უწოდებს და დანარჩენ დეტალებზე არ საუბრობს.

გაიგე მეტი: