დროას ლიდერის, ელენე ხოშტარია განცხადებით, პარტია დასუფთავების სამსახურის თანამშრომლებს იურიდიულ მხარდაჭერას უცხადებს. ამის შესახებ მან სპეციალურ ბრიფინგზე ისაუბრა.

"მინდა, მივმართო ყველა თანამშრომელს, ნუ გეშინიათ, პროტესტი არის თქვენი უფლება. იცოდეთ, თქვენ არ ხართ მარტო. ჩვენ თქვენს უფლებებს დავიცავთ როგორც პოლიტიკურად, ისე სამართლებრივად და ფიზიკურადაც", — განაცხადა მან.

პარტიის პრესსამსახურის ცნობით, მას შემდეგ, რაც თბილსერვისის თანამშრომლები ზეწოლაზე ალაპარაკდნენ, დროამ გადაწყვიტეს, რომ პარტიონ ორგანიზაციებთან ერთად, მათ შესაბამისი იურიდიული დახმარება გაუწიოს.

თბილსერვისის თანამშრომელმა, ირაკლი ბაღდავაძემ 13 აგვისტოს განაცხადა, რომ ხელმძღვანელმა, რომეო მიქაუტაძემ გაჩუმებისა და კალაძეზე საჯარო ბოდიშის მოხდის სანაცვლოდ ფული შესთავაზა. მიქაუტაძე აღნიშნულს აბსურდულს უწოდებს და დანარჩენ დეტალებზე არ საუბრობს.

დღეს, 21 აგვისტოს ირაკლი ბაღდავაძის განცხადებით, ის სამსახურში დაიბარეს და მიმდინარე მოვლენებზე კითხვები დაუსვეს.

:საქმეს რომ მორჩებიან, მაგასთან დაკავშირებით იყო ძირითადი კითხვები, საიდან წამოვიდა ეს ყველაფერი და გავეცი პასუხი, საიდან წამოვიდა, ჩამოვწერე ყველაფერი — რა იყო და როგორ იყო", — განაცხადა მან შეხვედრის დასრულების შემდეგ.

დასუფთავების სამსახურის თანამშრომლებმა 6 აგვისტოს რთულ სამუშაო პირობები გააპროტესტეს და ხელფასის მომატების მოთხოვნით აქცია გამართეს. მათი განცხადებით, ამ დრომდე არ აქვთ ზაფხულის უნიფორმა და დაზიანებული ურნების თრევა უწევთ. დედაქალაქის ვიცე-მერმა, ირაკლი ხმალაძემ გაფიცვას "უკანონო" უწოდა და განაცხადა, რომ დასუფთავების სამსახურის თანამშრომლებისთვის ხელფასების მომატება და უნიფორმის შეცვლა ისედაც დაგეგმილი იყო.

თბილსერვის ჯგუფში აცხადებენ, რომ შეთანხმება შედგა და გაფიცულების მოთხოვნები "გონივრულ ვადებში" დაკმაყოფილდება, თუმცა რას გულისხმობს გონივრული ვადა ჯერჯერობით უცნობია. დასუფთავების სამსახურის თანამშრომლებმა გაფიცვა შეწყვიტეს.