პრემიერმინისტრი ირაკლი ღარიბაშვილი ისევ ამტკიცებს, რომ ქვეყანაში უპრეცენდენტო ეკონომიკური ზრდაა და ბიზნესს მიემატა თავდაჯერებულობა. მისი აზრით, იმ "პოლიტიკური სიმყარიდან" გამომდინარე, რომელიც შექმნეს, ბიზნესს სტაბილურობის განცდა აქვს.

"მას შემდეგ რაც დავიწყეთ ვაქცინების შემოტანა ეტაპობრივად, ასევე ეტაპობრივად დავიწყეთ გახსნა ეკონომიკის, იმიტო რომ მოგეხსენებათ, ძალიან გაუჭირდა ისედაც გაჭირვებულ ჩვენს მოსახლეობას ბოლო წლების განმავლობაში. განსაკუთრებით ბოლო წლებში, 2020 წელს, ვინაიდან ათასობით და ათი ათასობით ადამიანმა დაკარგა სამუშაო ადგილი და ძალიან გაუჭირდა ჩვენს მოსახლეობას. ის 200-ლარიანი დახმარება, რა თქმა უნდა, არ იყო საკმარისი.

ამიტომაც ჩვენ დავიწყეთ გაზრდა. აპრილში გვქონდა უპრეცენდენტო ეკონომიკური ზრდა, 45%-იანი და ამის თავდაჯერებულობა ჩვენ ბიზნესს მიეცა სწორედ იმ პოლიტიკური სიმყარიდან გამომდინარე და სტაბილურობიდან გამომდინარე, რომელიც ჩვენ შევქმენით, რომ ბიზნესს აქვს სტაბილურობის განცდა, პროგნოზირებადობის განცდა. მაისში გვქონდა ასევე მაღალი ეკონომიკური ზრდა, 25%, ივნისში — 18% და ბოლო 6 თვეს ჩვენ გვაქვს 12% ანუ ორნიშნა ეკონომიკური ზრდა", — განაცხადა ღარიბაშვილმა.

2020 წელს საქართველოში, ისევე როგორც მსოფლიოს უმრავლეს ქვეყანაში, ეკონომიკამ მძიმე დარტყმა მიიღო — ქვეყნის მთლიანი შიდა პროდუქტი 6,2%-ით შემცირდა და მუდმივ ფასებში ეკონომიკის ზომამ 40,3 მილიარდი ლარიდან 37,8 მილიარდ ლარამდე იკლო.

2021 წელს ქვეყნის ეკონომიკური მდგომარეობა გარკვეულწილად შეიცვალა, თუმცა იქიდან გამომდინარე, რომ მიმდინარე პერიოდის მაჩვენებლები გასული წლის სრულად გაჩერებული ეკონომიკის მონაცემებს დარდება, ზოგჯერ სტატისტიკა რეკორდულად მაღალი ჩანს. მთავრობაც არ აყოვნებს და ხშირად გვახსენებს, რომ "ქვეყნის ეკონომიკა დუღს და მუშაობს".