საქართველოს პრემიერმინისტრის, ირაკლი ღარიბაშვილის მტკიცებით, ევროპული საბჭოს პრეზიდენტი, შარლ მიშელი, კიდევ ერთხელ დაარწმუნა, რომ საქართველო 19 აპრილის შეთანხმების დღის წესრიგის ერთგული რჩება. ამის შესახებ მან საკუთარ Twitter-ზე დაწერა.

"კიდევ ერთხელ დავარწმუნე ევროპული საბჭოს პრეზიდენტი, რომ საქართველო 19 აპრილის შეთანხმებით გაწერილი რეფორმების დღის წესრიგის ერთგული რჩება. ამ რეფორმების მნიშვნელოვანი ნაწილი უკვე განხორციელდა და ჩვენ მტკიცედ ვაგრძელებთ დანარჩენ რეფორმებზე მუშაობას", — წერს ის.

მიშელმა ღარიბაშვილთან შეხვედრის შემდეგ განაცხადა, რომ რეფორმები ახლა ისეა საჭირო, როგორც არასდროს. მისი თქმით, მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ შეთანხმების ერთგულება აჩვენოს.

შარლ მიშელი და ირაკლი ღარიბაშვილი ერთმანეთს კიევში, ყირიმის სამიტის მიმდინარეობისას, არაფორმალურ გარემოში შეხვდნენ.