აბაშაში გაუჩინარებული მოზარდის ცხედარი იპოვეს. საგანგებო სიტუაციების მართვის სამსახურში აცხადებენ, რომ საძიებო-სამაშველო ოპერაციის ფარგლებში მაშველებმა ცხედარი მდინარე რიონში იპოვეს.

მოზარდის ძებნა 21 აგვისტოს დაიწყო. როგორც ბავშვის ახლობლები On.ge-სთან საუბრისას აცხადებენ, ის მდინარე რიონში დღის სამ საათზე შევიდა, რის შემდეგაც სამაშველო გამოიძახეს, რომელიც ადგილზე დაგვიანებით მივიდა.

"მოვიდნენ რაღაც 2 ნავით, შევიდნენ, გაიარეს, გამოიარეს და იმის მერე სხედან. სამი ბავშვი შევიდა, ორს ვიღაცებმა მოუსწრეს და ერთი ჩაიძირა. ეძებენ ახლა. მაშველები რომ ადრე მოსულიყვნენ, სავარაუდოდ, უფრო ადრე იპოვიდნენ ბავშვს, დააღამეს და შემდეგ მოვიდნენ", — განაცხადა მან.

უწყებაში კი ამბობენ, რომ შეტყობინების მიღებისთანავე გავიდნენ პირველი მორეაგირე სამაშველო ჯგუფები სპეციალური მცურავი საშუალებებით და დაიწყო საძიებო-სამაშველო ღონისძიებები, როგორც წყალში, ასევე, მდინარის სანაპიროებზე. მათივე თქმით, სხვადასხვა რეგიონიდან ადგილზე მოხდა დამატებითი სპეციალური ტექნიკის და ცოცხალი ძალის მობილიზება.

სააგენტოს ინფორმაციით, ადგილზე მუშაობდა სახანძრო-სამაშველო ძალების დეპარტამენტის 105 თანამშრომელი, მწყალქვეშა სამუშაოებს აწარმოებდა 6 მყვინთავი, მობილიზებული იყო 7 მცურავი საშუალება და დრონი. მათივე თქმით, წყლის ფსკერის დათვალიერება მიმდინარეობდა სპეციალური სკანერის, ექოლოტის საშუალებით და მდინარის ნაპირზე მოწყობილი იყო სპეციალური საველე შტაბი.