ტელეკომპანია რუსთავი 2-ისა და ქიბარ ხალვაშის ადვოკატები ამბობენ, რომ ბრძოლა ტელეკომპანიაზე კონტროლისთვის სტრასბურგში მხოლოდ ახლა იწყება და მის მიერ 7 მარტს გამოტანილი გადაწყვეტილება, უზენაესი სასამართლოს გადაწყვეტილების აღსრულების შეჩერების შესახებ, მხოლოდ დროებითი ღონისძიებაა. ადამიანის უფლებათა ევროპულმა სასამართლომ უახლოეს მომავალში უნდა მიიღოს გადაწყვეტილება საქმის წარმოებაში მიღების შესახებ, რაზეც მნიშვნელოვნადაა დამოკიდებული ტელეკომპანიის მომავალი მფლობელების საკითხი.

თუმცა, კიდევ რა გზები შეიძლება არსებობდეს რუსთავი 2-ის საბოლოო ბედის გადასაწყვეტად და სარედაქციო პოლიტიკის შესაცვლელად, ამის გარკვევას On.ge შეეცადა.

ვარიანტი პირველი: რუსთავი 2 ნიკა გვარამიას გარეშე

ორმა განსხვავებულმა წყარომ On.ge-ს სხვადასხვა დროს მიაწოდა ინფორმაცია იმის შესახებ, რომ რუსთავი 2-ის ერთ-ერთ ამჟამინდელ მფლობელთან, გია ყარამანიშვილთან მიდის მოლაპარაკება ტელეკომპანიის დირექტორის, ნიკა გვარამიას გადაყენებისა და მის ნაცვლად სხვა პირის დანიშვნის შესახებ. On.ge აღნიშნული ინფორმაციის გადამოწმებას მხარეებთან შეეცადა.

ჩვენ დავუკავშირდით გია ყარამანიშვილს, რომელსაც დავუსვით კითხვა, აპირებს თუ არა ნიკა გვარამიას პოსტიდან გადაყენებას, რაზეც მან გვიპასუხა: "არა, არ ვაპირებ. ამ სისულელეებს ნუ მეკითხებით, მე მხოლოდ ჩემს ჟურნალისტებს ველაპარაკები” - ამის შემდეგ გია ყარამანიშვილმა ჩვენთან საუბარი არ ისურვა და ტელეფონი გაგვითიშა.

ჩვენ ასევე ვკითხეთ ნიკა გვარამიას, ტელეარხის მფლობელებს მასთან ჰქონდათ თუ არა საუბარი პოსტიდან გადაყენების შესახებ. გვარამიას თქმით, მსგავსი საუბარი პირადად მასთან არ ყოფილა, თუმცა, ის ამბობს, რომ ეს ტექნიკურად რთული პროცესი იქნება:

"მე ხელშეკრულება გაფორმებული მაქვს 2020 წლამდე. თუ ხელშეკრულებას ვადაზე ადრე გამიწყვეტენ, კონტრაქტის მიხედვით, ხელშეკრულების გაწყვეტამდე უნდა გადამიხადონ 5 მილიონი აშშ დოლარი".

ვარიანტი მეორე: ხალვაშის საკუთრების უფლების დაცვა საკონსტიტუციო სასამართლოში

ქიბარ ხალვაშმა რუსთავი 2-ზე კონტროლის ასაღებად, შესაძლოა საკონსტიტუციო სასამართლოს მიმართოს. როგორც ცნობილია, საქართველოს სამივე ინსტანციის სასამართლომ რუსთავი 2 ხალვაშს მიაკუთვნა, თუმცა, აღნიშნული გადაწყვეტილების აღსრულება ევროსასამართლომ შეაჩერა საბოლოო გადაწყვეტილებამდე. საქართველოს საკონსტიტუციო სასამართლოსთვის მიმართვის საფუძველი კი, შეიძლება გახდეს ის არგუმენტი, რომ ამ გზით შესაძლოა იზღუდებოდეს საკუთრების კონსტიტუციური უფლება. ხალვაშის ადვოკატი, პაატა სალია On.ge-სთან ინტერვიუში აღნიშნული მიმართულებით დავას არ გამორიცხავს:

"კონკრეტულად წავალთ თუ არა საკონსტიტუციო სასამართლოში, ასეთი გადაწყვეტილება ჯერ მიღებული არ არის, ამის თქმა შემიძლია ახლა, მაგრამ ვფიქრობთ, შეიძლება ეს ბერკეტიც იქნეს გამოყენებული. თუმცა რთულია, არის გარკვეული სამართლებრივი სიძნელეები, საკითხები, რომელსაც დამატებითი დამუშავება და გააზრება სჭირდება. ჯერჯერობით კონკრეტული გადაწყვეტილება მიღებული არ გვაქვს".

პაატა სალიას თქმით, ამჟამად ხალვაშის მხარე კონცენტრირებულია ევროსასამართლოზე, სადაც უახლოეს პერიოდში უნდა გადაწყდეს რუსთავი 2-ის სარჩელის წარმოებაში მიღების საკითხი:

"ჩვენ ბევრი მიმართულებით ვფიქრობთ, როგორ შეიძლება დავიცვათ საკუთრების უფლება. სასამართლომ რადგან მიაკუთვნა ხალვაშს, ინტერესი არსებობს, რომ ეს დავიცვათ. ჩვენ მაინც ვვარაუდობთ და ვფიქრობთ, რომ სტრასბურგის სასამართლო უახლოეს მომავალში გაერკვევა დეტალებში, საკმაოდ მცირე დრო იყო, რომ სასამართლო გარკვეულიყო. გარდა ამისა, ჩვენ მოვითხოვეთ, როგორც მესამე პირად ჩართვა. არ ვიცი, სასამართლო ამას რამდენად დააკმაყოფილებს. თუმცა, ჩვენ ეს ნაბიჯი განპირობებული იყო იმით, რომ გვინდოდა სასამართლოს ჩვენი პოზიცია სცოდნოდა, ანუ ჩვენს განცხადებას ნებისმიერ შემთხვევაში წაიკითხავდა. ჩვენ ცალსახად მივუთითეთ, რომ არანაირი ჩარევა სარედაქციო საქმიანობაში არ იგეგმება".

On.ge დაუკავშირდა რუსთავი 2-ის ერთ-ერთ იურისტს, თამთა მურადაშვილს, რომელსაც ვკითხეთ, რამდენად რეალისტური შეიძლება იყოს ქიბარ ხალვაშის დავა საკონსტიტუციო სასამართლოში საკუთრების უფლების აღსადგენად. მურადაშვილი მიიჩნევს, რომ სტრასბურგის გადაწყვეტილებისთვის გვერდის ავლა იქნება სამართლებრივი სივრციდან გასვლა:

"საერთოდ, ნებისმიერი ფორმა და ნებისმიერი გზით სტრასბურგის სასამართლოს გადაწყვეტილებისთვის გვერდის ავლა არის უკანონო, ასევე ქვეყნის მხრიდან უპასუხისმგებლო გადაწყევტილება და იმის დეკლარირება, რომ ის არ ემორჩილება, არ აღიარებს მას. ეს სამართლებრივ ჩარჩოებს სცდება და ცალსახად პოლიტიკური გადაწყვეტილება იქნება. თუმცა, ის, თუ როგორ ჩაატარეს საკონსტიტუციო რეფორმა საქართველოში და ის, თუ როგორ შეიძლება საკონსტიტუციო სასამართლომ მიიღოს სტრასბურგის სასამართლოს საწინააღმდეგო გადაწყვეტილება, ვფიქრობთ, არ არის გამორიცხული იმიტომ, რომ ჩვენ ვიცით, საკონსტიტუციო სასამართლოს რა დაემართა. ყველა სახელმწიფო სტრუქტურა რომ ქიბარ ხალვაშისთვის იბრძვის, ეს ჩვენთვის ახალი არ არის. ნებისმიერ შემთხვევაში, საკონსტიტუციო სასამართლო საბოლოოდ შეირცხვენს თავს და საბოლოოდ გააკეთებს დეკლარირებას, რომ დიახ, ის არის სახელმწიფოს მხრიდან პოლიტიკურად მოტივირებული მოსამართლეებისგან შემდგარი, თუ ეს ასე მოხდა".

თამთა მურადაშვილი ამბობს, რომ გამოხატვის უფლება საკუთრების უფლებით არ უნდა შეიზღუდოს: "როდესაც არის უფლებების დავა და ორი უფლება ერთმანეთთან ჭიდილში მოდის, როდესაც ორი უფლება ერთმანეთს უპირისპირდება, სიტყვის თავისუფლების უფლება გადაწონის სხვა უფლებას, ის იმდენად მნიშვნელოვანი უფლებაა. კანონით დაცული ყველაზე დიდი სიკეთე არის სიცოცხლის უფლება და ძალიან ხშირად, სიტყვის თავისუფლება იმდენად მნიშვნელოვანია, ქვეყანაში, რომ ძალიან ხშირად, სიტყვის თავისუფლება ყველაზე მეტად დაცულ სიცოცხლის უფლებასაც გადაარჩენს ხოლმე. ამიტომ, ქიბარ ხალვაშისთვის ბრძოლა საკონსტიტუციო სასამართლოს მხრიდან და სასამართლოს მხრიდან მისი მოთხოვნის დაკმაყოფილება, კიდევ ერთი დასტური იქნება ამ პროცესის პოლიტიკური მოტივისა. ეს ჩვენთვის კიდევ ერთი დამადასტურებელი საბუთი იქნება სტრასბურგში, რომ დიახ, ეს არის პოლიტიკურად მოტივირებული დავა".

წყარომ, რომელმაც On.ge-ს მიაწოდა ინფორმაცია რუსთავი 2-ის გენერალური დირექტორის შესაძლო გადაყენების შესახებ, ასევე გვითხრა, რომ საკონსტიტუციო სასამართლოში საკუთრების დავის გაგრძელების შემთხვევაში, შესაძლოა, მოსამართლეებთან მომლაპარაკებლის ფუნქცია ჰქონდეს ყოფილ პარლამენტარს, პავლე კუბლაშვილს, რომელიც ამბობს:

"ეს არის სრული აბსურდი, არ ვიცი ამ სისულელეებს ვინ იგონებს. მე არანაირი კავშირი არ მაქვს პროცესთან, რომელიც შეიძლება უკავშირდებოდეს რუსთავი 2-ს ან საკონსტიტუციო სასამართლოს, საერთოდ თბილისშიც დღეს ჩამოვედი. ამ ამბავს სიმართლესთან საერთოდ არ აქვს შეხება".