თუ მაინცდამაინც მილიონერებისა და მილიარდერების სიაში არ წერია შენი სახელი-გვარი, მაშინ, ალბათ, შენთვისაც არასდროსაა საკმარისი ფული და ყოველთვის შეიძლება აღმოჩნდე ისეთ კრიტიკულ მომენტში, როცა მოულოდნელად გაიაზრებ, რომ ჯიბეცარიელი ხარ.

თან ასეთ დროს ვერც კი ხვდები, თუ როდის, სად და როგორ დაგეხარჯა მთელი ხელფასი. Reddit-ის მომხმარებელმა იკითხა, თუ ვის რა ხერხი ჰქონდა სწორედ ასეთი სიტუაციების მაქსიმალურად შესამცირებლად და შესაბამისი პასუხებიდან ახლა რამდენიმე ისეთ იდეას წარმოგიდგენთ, რომლებიც, შესაძლოა, თქვენც გამოგადგეთ.

1. "ყოველ ჯერზე, როცა რაღაც "განსაკუთრებულის" (იმპულსურად) ყიდვა მოგინდება, პრინციპულად ერთი კვირა დაიცადე, სანამ მართლა იყიდდე. თუ გადაგავიწყდა, ესე იგი, სულაც არ გინდოდა ეგრე ძალიან"

2. "საჭმელი თავად მოიმზადე. ასე დროსაც უფრო საინტერესოდ გაიყვან და უამრავ ფულსაც დაზოგავ, განსაკუთრებით მაშინ, თუ კაფე-რესტორნების ხშირი სტუმარი ხარ"

3. "სცადე, გაფუჭებული საგნები თავად შეაკეთო, ვიდრე მაშინვე ახლით ჩაანაცვლო ან ვინმეს გადაუხადო ფული მათ შეკეთებაში. ამაში YouTube-ც დაგეხმარება"

4. "სანამ სადმე გასვლას დავაპირებ, იქამდე სახლში ვსვამ ხოლმე ალკოჰოლს, რადგან მსგავსი სასმელები ძალიან ძვირი ღირს ხოლმე და ამ გზით ფული ძალიან მეზოგება"

5. "არასდროს წახვიდე მშიერი საყიდლებზე"

6. "ყოველთვის ყველაზე იაფიანი გამოსავლით ნუ დაიძვრენ თავს. ეცადე, ოდნავ უკეთესი ვარიანტი შეიძინო. ყველაზე იაფი სარეცხის მანქანა სამი წელი გაგიძლებს და შემდეგ ახლის ყიდვა მოგიწევს. ამიტომ ჯობია, განსაკუთრებულ შეთავაზებას დაელოდო, მაგალითად, შავ პარასკევს ან სხვა ფასდაკლებას და უკეთესი მოდელი შეიძინო შენთვის ხელსაყრელ ფასად"

7. "სამსახურში საჭმელი სახლიდან გაიყოლე"

8. "რასაც გამოიმუშავებ, იმის 10% სრულად შენ გეკუთვნის და გადაინახე" — როცა ყველაზე მდიდარი ბაბილონელი კაცის ეს სიტყვები წავიკითხე, მაშინვე დავიწყე ბანკის ერთ ანგარიშზე ყოველთვიურად ჩემი ხელფასის მეათედის შენახვა. თავიდან ბევრი არ ჩანს, მაგრამ რაღაც დროის შემდეგ უზომოდ კმაყოფილი დარჩები შენი დანაზოგით"

9. "როცა სამსახურში გარკვეულ ანაზღაურებას გთავაზობენ, ყოველთვის შეგიძლია, თავაზიანად უფრო მეტი მოითხოვო. როგორც წესი, ამას დამსაქმებელი ელის კიდეც და გასარისკი არაფერია, თუ ამას ისე არ წარმოაჩენ, როგორც ულტიმატუმს"

10. "მაქსიმალურად ეცადე, რომ ნებისმიერი პროდუქტი დიდ შეფუთვაში იყიდო და თანაც ფასდაკლებებს ჩაუსაფრდე. ამავდროულად, შეგიძლია, უკვე ყოველდღიურობაში გაცილებით პატარა კონტეინერებით გამოიყენო: მაგალითად, თუ დიდი ზომის შამპუნი იყიდე, უფრო პატარა ჭურჭელში გადაასხი და ისე მოიხმარე ეტაპობრივად. ასე უფრო ნაკლებს დახარჯავ და უფრო გვიან მოგიწევს ახლის ყიდვაც"