თბილსერვისის თანამშრომელი, ირაკლი ბაღდავაძე აცხადებს, რომ ხელმძღვანელმა, რომეო მიქაუტაძემ გაჩუმებისა და კალაძეზე საჯარო ბოდიშის მოხდის სანაცვლოდ ფული შესთავაზა. მიქაუტაძე აღნიშნულს აბსურდულს უწოდებს და დანარჩენ დეტალებზე არ საუბრობს.

"სამსახურის მერე მოვდივარ, გამოვიცვალე ფორმა და დათო გელოვანი მანქანით მხვდება, წამოდი გავისეირნოთო. მე მეგონა, აქციაზე, რომ პროტესტი გამოვაცხადე, რომ ბუნკერი არ გვივარგა, მანქანა არ გვივარგა, უბანში ესეთი მდგომარეობაა, იქ უნდა ამიყვანოს და ვაჩვენო, აი, რა პრობლემა არის. ამასობაში უხვევს და მიდის აეროპორტის ტრასისკენ. ვეკითხები, სად მივდივართ, მივდივართ რომეო მიქაუტაძესთან. შევდივართ, იკეტება კარები რომეო მიქაუტაძესი და ვჯდებით და ვლაპარაკობთ [...]

რამდენი გიჯდება გირაოთი, მაგალითად, აი ბინა, მე მეუბნება ამას და რას მთავაზობ-მეთქი? არ მინდა, ჩემით მივაღწევ ყველაფერს-მეთქი [...]

დამავალეს რა, კალაძეს მოუხადე ბოდიში, ვთქვა ყველაფერზე უარი, უკაცრავად რომ არასწორი ინფორმაცია მომივიდა. მეუბნება რომეო მიქაუტაძე მაგას, რომ შენ ეს თქვი, მე ვიცი რა უნდა გავაკეთო შენი ოჯახისთვის", — ამბობს ბაღდავაძე TV პირველთან საუბრისას.

On.ge დაუკავშირდა თბილსერვისის პრესსამსახურს, რომელმაც თქვა, რომ ბაღდავაძის ბრალდება სიმართლეს არ შეესაბამება. მისი თქმით, შეხვედრა ნამდვილად შედგა, თუმცა მსგავს საკითხებზე არ უსაუბრიათ.

"რა თქმა უნდა, სიცრუეს წარმოადგენს აღნიშნული კომენტარი, ამის მსგავსი საერთოდ არაფერი არ უთქვამს დირექტორს და ბატონმა რომეომაც განაცხადა ამასთან დაკავშირებით, რომ სიცრუე არის და სინამდვილეს არ შეეფერება მის მიერ გავრცელებული განცხადება", — განაცხადეს მათ.

დასუფთავების სამსახურის თანამშრომლებმა 6 აგვისტოს რთულ სამუშაო პირობები გააპროტესტეს და ხელფასის მომატების მოთხოვნით აქცია გამართეს. მათი განცხადებით, ამ დრომდე არ აქვთ ზაფხულის უნიფორმა და დაზიანებული ურნების თრევა უწევთ. დედაქალაქის ვიცე-მერმა, ირაკლი ხმალაძემ გაფიცვას "უკანონო" უწოდა და განაცხადა, რომ დასუფთავების სამსახურის თანამშრომლებისთვის ხელფასების მომატება და უნიფორმის შეცვლა ისედაც დაგეგმილი იყო.

თბილსერვის ჯგუფში აცხადებენ, რომ შეთანხმება შედგა და გაფიცულების მოთხოვნები "გონივრულ ვადებში" დაკმაყოფილდება, თუმცა რას გულისხმობს გონივრული ვადა ჯერჯერობით უცნობია. დასუფთავების სამსახურის თანამშრომლებმა გაფიცვა შეწყვიტეს.