თბილისში, ლორთქიფანიძის ქუჩაზე, საცხოვრებელი კორპუსის მიმდებარედ ფერდის ნაწილის ჩამოშლის შემდეგ, მერიამ მოსახლეობის ევაკუცია დაიწყო. ლორთქიფანიძის ქ. N10-ში მდებარე კორპუსში მცხოვრებლებს სხვადასხვა სასტუმროში გადაანაწილებენ.

დედაქალაქის მერის მოადგილის, ირაკლი ბენდელიანის, განცხადებით, არსებობს გარკვეული რისკები, ამიტომ მოსახლების ევაკუაციის გადაწყვეტილება მოსახლეობის უსაფრთხოებიდან გამომდინარე მიიღეს.

"პირველი ამოცანაა, მოსახლეობა იყოს უსაფრთხოდ, რეალური საფრთხე არსებობს თუ არა, ამის მიუხედავად. გარკვეული რისკები არსებობს. ამიტომ 1%-იც რომ იყოს რისკი, ვერავის დავტოვებ იმ 1% რისკის ქვეშ. სასწრაფოდ არის ეს ყველაფერი დასაორგანიზებელი და ამ პროცესში ვართ", — განაცხადა ბენდელიანმა.

მისი ინფორმაციით, კორპუსში 90-მდე ოჯახი ცხოვრობს. ბენდელიანმა ასევე განაცხადა, რომ კორპუსის მშენებლობა აღარ გაგრძელდება.

"რა თქმა უნდა, ამ ეტაპზე აღნიშნულ ტერიტორიაზე ვერავინ ვერაფრის მშენებლობას ვერ გააგრძელებს. სამშენებლო პროცესი დაკავშირებული ინება მხოლოდ ფერდის გამაგრებასთან და კორპუსის გამაგრება თუ იქნება საჭირო, მაგასაც გავაკეთებთ", — ამბობს თბილისის მერის მოადგილე.

ლორთქიფანიძის ქუჩაზე ფერდის ნაწილი საცხოვრებელი კორპუსის წინ დღეს, დაახლოებით 19:00 საათზე ჩამოიშალა. შემთხვევის შედეგად არავინ დაშავებულა.