მეექვსე დღეა, საბერძნეთი მასშტაბურ ხანძარს ებრძვის. კუნძულ ევიაზე ათასობით მაცხოვრებლის ევაკუირება გახდა აუცილებელი. მეხანძრეებთან ერთად, ცეცხლის ჩაქრობის პროცესში საბერძნეთის არმია ჩაერთო. New York Times ოფიციალურ პირებზე დაყრდნობით წერს, რომ ცეცხლის გაჩენის ბრალდებით სამი ადამიანი დააკავეს.

ძლიერი ხანძარი საბერძნეთში

ფოტო: Reuters/Alexandros Avramidis

ხანძარი სამ აგვისტოს ათენის გარეუბანში, ვარიბობში გაჩნდა და აღმოსავლეთისკენ, მთა პარნიტასკენ გავრცელდა. როდესაც ცეცხლი გაჩნდა, ტემპერატურა 42-44 გრადუსს შორის მერყეობდა. მაღალი ტემპერატურის გამო სახანძრო თვითმფრინავებმა ფრენა ვერ შეძლეს, ზოგიერთს ტექნიკური პრობლემები შეეექმნა, რის შედეგადაც ცეცხლი კიდევ უფრო გავრცელდა.

მიმდებარე ქალაქებმა — კრიონერიმ, კოკინოვრაჩოსმა და აფიდნესმა — ევაკუაციის ბრძანება მიიღეს. ამ დროისთვის კუნძულ ევიაზე 2 000-ზე მეტი მაცხოვრებელი და ტურისტია ევაკუირებული. საბერძნეთს ხანძრის ჩაქრობის სამუშაოებში ეხმარება: საფრანგეთი, ეგვიპტე, შვეიცარია, დიდი ბრიტანეთი, ესპანეთი, უკრაინა.

მეხანძრე

ფოტო: Reuters

6 აგვისტოს ტემპერატურის ვარდნის მიუხედავად, ქარისგან გაჩენილი ხანძარი კიდევ უფრო გავრცელდა. ბოლო 10 დღის განმავლობაში, ჯამში, 56 000 ჰექტარი დაიწვა.

7 აგვისტოს მონაცემებით, ხანძრის შედეგად გარდაცვლილია სულ მცირე ორი ადამიანი, მათ შორის, ერთი მეხანძრე. 20-ზე მეტი ადამიანი დაშავდა.

რეგიონის სხვადასხვა ნაწილში უკონტროლო ხანძრის გამო, ხელისუფლებამ საავტომობილო გზის ნაწილი კორინთოს, ტრიპოლისა და კალამატას შორის ჩაკეტა.

ხანძრის ქრობის სამუშაოები საბერძნეთში

ფოტო: Reuters/Alexandros Avramidis

"ეს არის უიმედო მდგომარეობა. ცეცხლი მიდის იქ, სადაც მას სურს, როდესაც სურს და ვერავინ აჩერებს მას", — განაცხადა დორიდას მერმა ადგილობრივ საინფორმაციო სააგენტოსთან და მთავრობას დახმარებისკენ მოუწოდა.

ამავდროულად, ადგილზე იმყოფებიან ცხოველთა კეთილდღეობის მოხალისეთა გუნდები, რათა შინაური, ქუჩაში მცხოვრები და გარეული ცხოველები გადაარჩინონ.