ჟურნალისტების მიერ პროკურატურაში შეტანილი განცხადების საპასუხოდ უწყებაში აცხადებენ, რომ ორგანიზატორების დადგენისა და სისხლის სამართლის პასუხისგებაში მიცემის მიზნით მიმდინარეობს აქტიური საგამოძიებო მოქმედებები.

"თბილისი პრაიდის საწინააღმდეგოდ გამართული აქციის საქმეებზე მიმდინარე გამოძიების ფარგლებში ამჟამად ბრალი წარდგენილი აქვს 27 პირს, რომლებსაც აღკვეთის ღონისძიების სახით შეფარდებული აქვთ პატიმრობა. ამავე საქმეებზე დაზარალებულად ცნობილია 1 იურიდიული პირი, 52 ფიზიკური პირი, მათ შორის 42 ჟურნალისტი და ოპერატორი.

ხსენებულ საქმეებზე მიმდინარეობს აქტიური საგამოძიებო მოქმედებები თბილისი პრაიდის საწინააღმდეგოდ გამართულ აქციაზე ძალადობრივ ქმედებებში და კანონდარღვევის ფაქტებში მონაწილე პირების იდენტიფიცირების, მათ შორის ორგანიზატორების დადგენის და სისხლის სამართლის პასუხისგებაში მიცემის მიზნით", — წერია პროკურატურის განცხადებაში.

ალტ-ინფოს ეთერში გაკეთებულ მუქარის შემცველ განცხადებებსა და ჟურნალისტებზე ძალადობის პირდაპირ მოწოდების არაერთ ფაქტზე ჟურნალისტებმა საქართველოს პროკურატურაში განცხადება 14 ივლისს შეიტანეს. კერძოდ, მედიის წარმომადგენლებს აინტერესებთ, მიმდინარეობს თუ არა გამოძიება, რა კვალიფიკაციით და მიცემულია თუ არა ვინმე სისხლისსამართლებრივ პასუხისგებაში.